Sabiq baş bankirə vəzifə verildi
Elman Rüstəmov baş nazirin müşaviri təyin edilib. Xəbəri aprelin 13-də APA yayıb.
Milli Məclisin 12 aprel iclasında prezident İlham Əliyevin iki təqdimatına baxılıb, Elman Rüstəmov Mərkəzi Bankın İdarə Heyətindən çıxarılıb, onu Taleh Kazımov əvəzləyib.
Elman Rüstəmov həmin günədək Mərkəzi Bankın (2009-cu ilədək Milli Bank adlanıb) sədri idi.
Novator.az bildirir ki, Elman Rüstəmov 1952-ci ildə doğulub. Azərbaycan Xalq Təsərrüfatı İnstitutunu (indiki Dövlət İqtisad Universiteti) bitirib, həmçinin aspirantura və doktorantura təhsilləri alıb. İqtisad elmləri doktorudur.
Azərbaycan Dövlət Plan Komitəsi yanında Elmi-Tədqiqat İqtisadiyyat İnstitutunda iqtisadçısı, böyük iqtisadçı, bölmə müdiri vəzifələrində çalışıb, Azərbaycan Yüngül Sənaye Nazirliyinin Bakı Zərif-Mahud İstehsalat Birliyində iqtisadiyyat idarəsinin rəisi olub, Prezident Aparatında böyük məsləhətçi postu tutub.
1992-ci ildə Milli Bankın İdarə Heyəti sədrinin birinci müavini vəzifəsinə təyinat alan Elman Rüstəmov 1995-ci ildən sədr postunda fəaliyyət göstərib.
