Qurbana “Şöhrət”
Aprelin 13-də sərəncam imzalayan prezident İlham Əliyev futbol xadimi Qurban Qurbanovu “Şöhrət” ordeni ilə təltif edib. Təltif Qurban Qurbanovun Azərbaycan futbolunun inkişafında xidmətləri ilə əsaslandırılıb.
Novator.az bildirir ki, aprelin 13-də Qurban Qurbanovun 50 yaşı tamam olub.
Qurban Qurbanov 1972-ci ildə Zaqatalanın Aşağı Tala kəndində doğulub. Azərbaycanın “Daşqın”, “Turan”, “Kür-Nur”, “Neftçi”, “İnter”, Gürcüstanın “Mertsxali”, “Alazani”, Rusiyanın “Dinamo” (Stavropol), “Fakel”, “Baltika”, “Volqar” klublarının və Azərbaycanın milli komandasının hücumçusu olub.
2006-cı ildə futbolçu karyerasını başa vuran Qurban Qurbanov Bakının “İnter” klubunun idman direktoru vəzifəsində çalışıb, sonra “Neftçi”də baş məşqçi və idman direktoru vəzifələrini tutub. 2008-ci ildən “Qarabağ” komandasının baş məşqçisidir.
2017-ci ilin noyabr ayından 2018-ci ilin dekabr ayınadək Azərbaycan milli komandasına da baş məşqçilik edib.
“Qarabağ” Qurban Qurbanovun dövründə 7 dəfə Azərbaycan çempionu olub, 4 dəfə Azərbaycan kubokunu qazanıb, 1 dəfə Çempionlar Liqasının qrup mərhələsində, 6 dəfə Avropa Liqasının qrup mərhələsində, 1 dəfə Konfrans Liqasının qrup mərhələsində oynayıb.
