Büdcənin ilk rübü
Maliyyə Nazirliyi 2022-ci ilin dövlət büdcəsinin icrasına dair bilgi yayıb.
Hesabata görə, birinci rübdə dövlət büdcəsinin mədaxili 7 milyard 9,6 milyon manat, xərcləri 5 milyard 629,5 milyon manat olub, 1 milyard 380,1 milyon manat artıqlıq yaranıb.
İqtisadiyyat Nazirliyi yanında Dövlət Vergi Xidmətinin xətti ilə büdcəyə 2 milyard 802,2 milyon manat, Dövlət Gömrük Komitəsinin xətti ilə 1 milyard 232 milyon manat, büdcədən maliyyələşən idarə və təşkilatların gördükləri iş və göstərdikləri ödənişli xidmətlərdən 165,1 milyon manat gəldiyi, bildirilir, sair daxilolmalar 53,3 milyon manat göstərilir.
Dövlət Neft Fondundan büdcəyə 2 milyard 757 milyon manat köçürüldüyü vurğulanır.
Rəsmi açıqlamaya görə, dövlət büdcəsi xərclərinin 74,4 faizi cari xərclərə, 19,4 faizi əsaslı xərclərə yönəldilib, sosial xərclər (əməyin ödənişi fondu, təqaüd və sosial müavinətlər, dərman və ərzaq xərcləri) dövlət büdcəsinin faktiki xərclərinin 49,3 faizini təşkil edib.
2022-ci ilin dövlət büdcəsində 26 milyard 816 milyon manat gəlir, 29 milyard 879 milyon manat xərc rəsmiləşib.
