Bir hədəfin üç istiqaməti
Milli Strateji Düşüncə Mərkəzinin sədri İsa Qəmbər “Amerikanın səsi” radiosuna müsahibədə Rusiya-Ukrayna müharibəsinin regional təsirlərindən, Azərbaycana təhdidlərdən danışıb: “Bu təhdidlərə qarşı dövlətin mövqeyi və ölkənin müttəfiqləri olmalıdır. Xoşbəxtlikdən Azərbaycanın güclü, NATO üzvü olan və bir sıra nüanslara baxmayaraq Qərblə birlikdə hərəkət edən Türkiyə kimi müttəfiqi var. Beynəlxalq birlik də Azərbaycan kimi yeni müstəqil dövlətlərə səbir və təmkinlə yanaşır, onların bu ümumdünya prosesində iştirakı üçün zəmin yaratmağa çalışır. Azərbaycan bu şərtlərə arxalanaraq, Türkiyənin müttəfiqliyinə, beynəlxalq birliyin müdafiəsinə inanaraq müəyyən cəsarətli addımlar atmağa hazır olmalıdır. Demokratik düşərgə də yükün bir hissəsini öz üzərinə götürməlidir.
Azərbaycanın hədəflərinə çatmaq üçün ölkədə milli birliyə nail olunmalı, Azərbaycan-Türkiyə müttəfiqliyi gücləndirilməli, ölkə çağdaş dünya ilə yaxınlaşmalı, bütövləşməlidir. Bu üç istiqamətdə atılan addımlar Rusiyanın təhdidlərinin qarşısını almağa yetərli ola bilər”.
Novator.az bildirir ki, 1957-ci il təvəllüdlü İsa Qəmbər milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə sədri olub, 1992-ci il mayın 18-dən iyunun 17-dək prezident səlahiyyətlərini icra edib.
İsa Qəmbər 1992-2014-cü illərdə Müsavat başqanı olub, hazırda partiya Məclisinin üzvüdür. Onun rəhbərlik etdiyi Milli Strateji Düşüncə Mərkəzi siyasətçiləri, müxtəlif sahələr üzrə ekspertləri, ictimai xadimləri birləşdirir.
