“Əhalimiz niyə susuz qalıb?”
Müsavat Partiyasının başqanı Arif Hacılı özünün “Facebook” səhifəsində Zaqatala rayonunun içməli su probleminə diqqət çəkib: “Zaqatalanın 16 min əhalisi olan Yuxarı Tala və Aşağı Tala kəndlərində içməli su yoxdur. Zaqatala şəhəri və bir çox digər kənd zaman-zaman su problemləri ilə üzləşir. İndiki hakimiyyətin ağız dolusu tənqid etdiyi 1992-1993-cü illərdə biz rayon mərkəzinin və kəndlərin içməli su problemini əsasən həll etmişdik. Çöllərdə sahələrin suvarılma işləri də qaydaya salınmışdı.
İndi, Azərbaycana milyardlarla neft dollarlarının gəldiyi bir dövrdə əhalimiz niyə susuz qalıb? Lazımsız və mənasız layihələrə milyonlar xərcləyən, təbii parkları, meydanları daş döşəyib bərbad hala salan icra başçısı Mübariz Əhmədzadə necə olur ki, rayonun su problemini həll etmək üçün vəsait tapa bilmir?”
Novator.az bildirir ki, 1962-ci ildə Zaqatalanın Yuxarı Tala kəndində doğulan Arif Hacılı milli azadlıq hərəkatının öncül şəxslərindəndir, Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
Mübariz Əhmədzadə 2009-cu ildən Zaqatalanın icra başçısıdır.
