Tanış rəqiblər
Novator.az Fransada prezident seçkisinin ikinci turuna çıxmış namizədləri təqdim edir.
Aprelin 10-da keçirilmiş ilk turda dövlət başçısı Emmanuel Makron (27,8%) və müxalif lider Marin Le Pen (23,1%) uğur qazanıblar. Onlar mübarizəni aprelin 24-nə təyin olunan ikinci turda davam etdirəcək.
Beş il öncə də eyni hal yaşanmışdı. 2017-ci il aprelin 23-də keçirilmiş prezident seçkisində Emmanuel Makron 24%, Marin Le Pen 21,3% səs toplamış, ikinci turda (7 may) Emmanuel Makron 66,1% səslə qalib olmuş, Marin Le Pen 33,9% nəticə göstərmişdi.
Emmanuel Makron 1977-ci il dekabrın 21-də doğulub. Paris Siyasi Tədqiqatlar İnstitutunu və Milli Administrasiya Məktəbini bitirib. Bank sektorunda çalışıb, Fransa prezidenti yanında baş katibin müavini olub. 2014-2016-cı illərdə iqtisadiyyat, sənaye və rəqəmli texnologiyalar naziri postunu tutub.
Əvvəllər Sosialist Partiyasının üzvü olan Emmanuel Makron 2016-cı ildə “İrəli, respublika!” hərəkatını yaradıb, 2017-ci il mayın 7-də prezident seçilib, mayın 14-də səlahiyyətlərinin icrasına başlayıb.
Marin Le Pen 1968-ci il avqustun 5-də doğulub. Panteon-Assas Universitetini hüquqçu ixtisası ilə bitirib.
1986-cı ildə atası Jan-Mari Le Penin liderlik etdiyi Milli Cəbhə Partiyasına qoşulub. 2011-ci ildə təşkilatın sədri seçilib. 2018-ci ildən qurum Milli Birlik Partiyası adlanır.
Marin Le Pen parlamentin aşağı palatasının üzvüdür.
Emmanuel Makron Fransanın 8-ci prezidentidir. 1959-1969-cu illərdə dövlət başçısı postunu Şarl de Qoll, 1969-1974-cü illərdə Jorj Pompidu, 1974-1981-ci illərdə Valeri Jiskar d’Esten, 1981-1995-ci illərdə Fransua Mitteran, 1995-2007-ci illərdə Jak Şirak, 2007-2012-ci illərdə Nikola Sarkozi, 2012-2017-ci illərdə Fransua Oland tutub.
