Elman Rüstəmov postdan gedir
Milli Məclisin 12 aprel iclasında prezident İlham Əliyevin iki təqdimatına baxılacaq. Təqdimatların biri Elman Rüstəmovun Mərkəzi Bankın İdarə Heyəti üzvlüyündən azad edilməsi, digəri Taleh Kazımovun İdarə Heyətinin üzvü təyin olunması barədədir.
Azərbaycan Konstitusiyasına görə, Mərkəzi Bankın İdarə Heyəti üzvlərinin vəzifəyə təyin və vəzifədən azad edilməsi parlamentin, İdarə Heyəti üzvləri sırasından Mərkəzi Bankın sədrini seçmək dövlət başçısının səlahiyyətindədir.
Elman Rüstəmov hazırda Mərkəzi Bankın (2009-cu ilədək Milli Bank adlanıb) sədridir.
Novator.az bildirir ki, Elman Rüstəmov 1952-ci ildə doğulub. Azərbaycan Xalq Təsərrüfatı İnstitutunu (indiki Dövlət İqtisad Universiteti) bitirib, həmçinin aspirantura və doktorantura təhsilləri alıb. İqtisad elmləri doktorudur.
Azərbaycan Dövlət Plan Komitəsi yanında Elmi-Tədqiqat İqtisadiyyat İnstitutunda iqtisadçısı, böyük iqtisadçı, bölmə müdiri vəzifələrində çalışıb, Azərbaycan Yüngül Sənaye Nazirliyinin Bakı Zərif-Mahud İstehsalat Birliyində iqtisadiyyat idarəsinin rəisi olub, Prezident Aparatında böyük məsləhətçi postu tutub.
1992-ci ildə Milli Bankın İdarə Heyəti sədrinin birinci müavini vəzifəsinə təyinat alan Elman Rüstəmov 1995-ci ildən sədr postundadır.
1983-cü il təvəllüdlü Taleh Kazımov “Paşa Bank”ın baş icraçı direktoru və İdarə Heyətinin sədridir.
Azərbaycan Texniki Universitetinin avtomatlaşma və kompüter mühəndisliyi fakültəsini bitirib, Azərbaycan Dövlət Neft Akademiyasında (indiki Dövlət Neft və Sənaye Universiteti) biznesin idarə edilməsi ixtisası üzrə, ABŞ-ın Corciya Ştat Universitetində maliyyə sahəsində biznesin idarə edilməsi ixtisası üzrə magistr dərəcələri alıb.
