Əli Əsədovdan yoxlama sərəncamı
Baş nazir Əli Əsədov aprelin 11-də sərəncam imzalayıb. Sənəd Fövqəladə Hallar Nazirliyinə 6 ay müddətində Energetika Nazirliyinin, Bakı Şəhər İcra Hakimiyyətinin (şəhər və rayon mərkəzlərinə münasibətdə yerli icra hakimiyyəti orqanlarının), “Azəriqaz” İstehsalat Birliyinin və “Azərişıq” Açıq Səhmdar Cəmiyyətinin nümayəndələri ilə birlikdə ölkə üzrə insanların kütləvi toplaşdığı bu növ obyektlərdə yanğın, radiasiya və texniki təhlükəsizlik qaydalarına düzgün riayət edilməsi ilə bağlı yoxlamalar aparılmasını təşkil etmək tapşırığını nəzərdə tutur:
– insanların müvəqqəti yaşayışı üçün nəzərdə tutulmuş binalarda, o cümlədən yataqxanalarda, mehmanxanalarda, sanatoriyalarda, istirahət evlərində, kempinqlərdə, motellərdə və s;
– mülkiyyət formasından asılı olmayaraq bütün sosial təyinatlı obyektlərdə, xəstəxanalarda, təhsil müəssisələrində və s;
– tamaşa və mədəni-maarif təşkilatlarının binalarında (teatrlar, kinoteatrlar, konsert zalları, muzeylər və s.);
– əhaliyə xidmət göstərən bütün ictimai obyektlərdə (ticarət mərkəzləri, kafelər, restoranlar və s.).
Aprelin 3-nə keçən gecə Bakının Səbail rayonundakı “Location” gecə klubunda partlayış baş verib. Hadisə nəticəsində 1 nəfər həlak olub, 37 şəxs xəsarət alıb, onların 2-si ötən həftə vəfat edib. İlkin sübutlara görə, obyektin mətbəxində qanunsuz olaraq, qaydaların tələbləri pozulmaqla propan qazının sıxılmış mayesi ilə dolu qaz balonundan istifadə edilib, balonun partlaması binada dağıntılara və yanğına gətirib.
