“Qarabağ”lı yol
UEFA-nın klub turnirlərində 2021-2022 mövsümü davam edir. Konfrans Liqasının 1/8 final yolunda Azərbaycan təmsilçisi “Qarabağ”ı ələmiş Fransanın “Marsel” komandası aprelin 7-də yarımfinala doğru addım atıb. 1/4 finalın ilk oyununda Yunanıstan PAOK-unu qəbul edən fransızlar 2:1 hesabı ilə üstün gəliblər.
Novator.az bildirir ki, 2014-cü ildən bəri UEFA-nın 5 klub turnirində “Qarabağ”a rəqib olmuş komanda həmin mövsüm finala çıxıb:
– Avropa Liqasının 2014-2015 mövsümündə “Qarabağ”la eyni qrupda yarışmış “Dnepr” (Ukrayna) komandası həmin mövsüm finalda oynayıb;
– Çempionlar Liqasının 2017-2018 mövsümündə “Qarabağ”la eyni qrupda mübarizə aparmış “Atletiko” (İspaniya) Avropa Liqasına ələnib və finala çıxaraq turnirin qalibi olub;
– Avropa Liqasının 2018-2019 mövsümündə “Qarabağ”la eyni qrupda oynamış “Arsenal” (İngiltərə) komandası həmin mövsüm finala çıxa bilib;
– Avropa Liqasının 2019-2020 mövsümündə “Qarabağ”la eyni qrupda yer almış “Sevilya” (İspaniya) həmin mövsüm finala qədər gedərək zəfər kubokunu başı üzərinə qaldırıb;
– Avropa Liqasının 2020-2021 mövsümündə “Qarabağ”la eyni qrupda oynamış İspaniya “Vilyarreal”ı finala çıxaraq turnirin qalibi olub.
Əsası 1951-ci ildə Ağdam şəhərində qoyulan “Qarabağ” komandası 1977-ci ilədək “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-in, 8 dəfə müstəqil Azərbaycanın çempionu olub.
