Qiymət təlatümü
İqtisadçı Rövşən Ağayev Dünya Bankının qlobal əmtəə bazarları hesabatına nəzər salıb. Novator.az-ın məlumatına görə, ekspert yazır ki, Rusiyanın Ukraynaya fevralın sonunda başlayan total hərbi müdaxiləsi əksər məhsullar üzrə ciddi bahalaşmaya gətirib: “Mart ayında kömürün və neftin qiyməti yanvar ayı ilə müqayisədə orta hesabla 25-30%, Avropada təbii qazın qiyməti 53%, Yaponiyada maye qazın qiyməti 22% yüksəlib. Buğda 30%, gübrələr orta hesabla 35-40%, nikel 50%, alüminium 17% dəyər artırıb.
Dünya iqtisadiyyatı belə yüksək qiymətlərə uzun müddət tab gətirə bilməz. Yüksək istehsal xərcləri yalnız tələbi azaltmır, öhdəliklərin icrası üçün resurs qıtlığı, sərmayə üçün ehtiyat yatırımlarını cari istehsal xərclərinin qarşılanmasına yönəltmək məcburiyyəti biznes fəallığının ciddi azalması riski yaradır”.
