Fəala təzyiqlər, başqandan etiraz
Müsavat Partiyasının fəalı Əziz Məmiyev aprelin 5-i Bakıda, Daxili İşlər Nazirliyinin binası qarşısında təkbaşına etiraz aksiyası keçirməyə cəhd göstərib. O, məlumat yayaraq bildirib ki, mənəvi terrorla üzləşir: “Facebook” şəbəkəsində saxta profillərlə məni təhdid edirlər. Bir müddət əvvəl xarici və gizli nömrələrdən mobil telefonuma zəng vurub söyürdülər. Daxili İşlər Nazirliyinə müraciətlər etdim, tədbir görülmədi”.
Şantaj olunduğunu, polisə çağırılıb hədələndiyini, bank hesabının qarət edildiyini vurğulayan fəal son günlər daha sərt təhdidlərə məruz qaldığını bildirib.
Xəbərə görə, Əziz Məmiyev 5 aprel aksiyasına cəhd göstərəndə tutularaq bir müddət polisdə saxlanıb.
Müsavat başqanı Arif Hacılı açıqlama yayaraq bildirib ki, Əziz Məmiyev partiyanın Gənclər Təşkilatının İdarə Heyətinin üzvüdür: “Əziz bəy ölkədə insan haqlarının pozulmasına qarşı, demokratik dəyişikliklər uğrunda fədakar mübarizə aparan gənclərimizdəndir. Sosial mediada hakimiyyətin fəaliyyətini kəskin tənqid etməsi, bu auditoriyada ciddi dəstək qazanması, etiraz aksiyalarında fəal iştirakı onu hakimiyyətin hədəfinə gətirib. Əziz Məmiyevə təzyiqlər ölkədə söz və ifadə azadlığına qarşı aparılan təqib siyasətinin davamıdır. Müxalif gənclərə qarşı təzyiqlərə son qoyulmalı, bütün siyasi məhbuslar azadlığa buraxılmalıdır”.
