ADR Rusiya etirazına hazırlaşır
Azərbaycan Demokratiya və Rifah (ADR) Partiyası Bakıda, Rusiya səfirliyi qarşısında piket keçirməyə qərar verib. Bakı Şəhər İcra Hakimiyyətinə göndərilən bilgidə qeyd olunub ki, aprelin 12-si saat 15-ə təyin edilən aksiyanın “Ukraynada müharibəni dayandırın!”, “Müharibə cinayətlərinə son qoyun!”, “Ukraynada dinc əhalinin kütləvi qətlini törədən rus ordusu sülhməramlı ola bilməz!”, “Rus ordusu Qarabağdan çıxsın!” kimi şüarları var.
Rusiyanın Azərbaycandakı səfirliyi paytaxtın Abbasqulu ağa Bakıxanov küçəsində yerləşır.
Novator.az bildirir ki, ADR Partiyası 2021-ci ildə təsis olunub. 2015-ci ildən fəaliyyət göstərmiş Azərbaycan Demokratiya və Rifah Hərəkatının bazasında yaradılan partiyaya Qubad İbadoğlu sədrlik edir.
1971-ci il təvəllüdlü Qubad İbadoğlu iqtisad elmləri namizədidir. Azərbaycan Dövlət İqtisad Universitetində və dünyanın bir çox ölkəsinin ali məktəbində dərs deyib, hazırda London İqtisadiyyat Məktəbinin professorudur.
ADR Partiyasının rəhbərliyində bu şəxslər yer alır: Adil Qeybulla, Arifə Hüseynli, Ellada Məmmədli, Ədalət Yusub, Əlövsət Sadıqlı, Əlövsət Talışxanlı, Hüseyn Məlik, Rafiq Abdullalı, Rövşən Dəmirli, Rüfət Əliyev, Rüfət Muradlı, Samir Abbaslı.
