Energetika Nazirliyinin 5 aprel məlumatına görə, “AzəriLayt” markalı Azərbaycan neftinin barreli 112,44 dollara satılır. Bu, büdcə qiymətindən 62,44 dollar yuxarı qiymətdir.
2022-ci ilin dövlət büdcəsində bir barrel neftin qiyməti 50 dollardan götürülüb. “AzəriLayt” yanvara 82,49, fevrala 94,20, marta 102,30, aprelə 112,33 dollarla başlayıb.
Rəsmi hesabata əsasən, ölkənin gündəlik xam neft hasilatı yanvarda 580,9 min barrel, fevralda 566,3 min barrel olub.
Beynəlxalq razılaşmaya görə, apreldə hasilat 682 min barreli, mayda 688 min barreli ötməməlidir. Novator.az bildirir ki, hasilat kvotasını iri neft ixracatçılarını birləşdirən OPEK+ koalisiyası müəyyən edib. Razılaşmanı OPEK ölkələrindən Anqola, Birləşmiş Ərəb Əmirlikləri, Ekvatorial Qvineya, Əlcəzair, İraq, Konqo, Küveyt, Qabon, Nigeriya, Səudiyyə Ərəbistanı və qeyri-OPEK ölkələri (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) dəstəkləyib.
