Aprelin siftəsi, kvotası
“AzəriLayt” markalı Azərbaycan neftinin barreli aprel ayına 112,33 dollarla start verib. Bu, büdcə qiymətindən 62,33 dollar yuxarı qiymətdir.
2022-ci ilin dövlət büdcəsində bir barrel neftin qiyməti 50 dollardan götürülüb. “AzəriLayt” yanvara 82,49, fevrala 94,20, marta 102,30 dollarla başlayıb.
Novator.az bildirir ki, rəsmi hesabata əsasən, Azərbaycanın gündəlik xam neft hasilatı yanvarda 580,9 min barrel, fevralda 566,3 min barrel olub.
Beynəlxalq razılaşmaya görə, apreldə hasilat 682 min barreli ötməməlidir.
Neft hasilatı kvotalarını iri neft ixracatçıları – OPEK ölkələri (Anqola, Birləşmiş Ərəb Əmirlikləri, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və qeyri-OPEK ölkələri (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) birgə müəyyən edir.
