Neftsiz ixracın üç lider məhsulu
İqtisadi İslahatların Təhlili və Kommunikasiya Mərkəzinin rəsmi hesabatına görə, 2022-ci ilin yanvar-fevral aylarında Azərbaycandan xaricə 461,8 milyon ABŞ dolları dəyərində qeyri-neft məhsulu göndərilib, ixrac 2021-ci ilin eyni dövrü ilə müqayisədə 39,4 faiz artıb.
İxrac məhsullarının ilk üçlüyündə pambıq mahlıcı (51,1 milyon dollar), karbamid (29,3 milyon dollar), qabığı təmizlənmiş meşə fındığının (28,6 milyon dollar) qərarlaşdığı vurğulanır.
Məlumata əsasən, Azərbaycandan qeyri-neft məhsulu alan əsas ünvanlar siyahısına Türkiyə başçılıq edir. Rusiya ikinci, Gürcüstan üçüncüdür.
İlk sıralarda İsveçrə, İtaliya, ABŞ, Çin, Ukrayna, Rumıniya, Türkmənistan, Qazaxıstan, Bolqarıstan da yer alır.
