Paşinyanın naziri tutulub
Martın 30-u axşam Ermənistanın fövqəladə hallar naziri Andranik Piloyanın tutulduğu bəyan olunub. Onun nazirlikdə aparılan korrupsiya araşdırmaları fonunda saxlandığı vurğulanır.
Məlumata görə, martın 28-də Milli Təhlükəsizlik Xidmətinin əməkdaşları Fövqəladə Hallar Nazirliyinin binasında axtarış aparıb, nazir həmin gün məzuniyyətə çıxıb, martın 29-da isə ifadə vermək üçün Antikorrupsiya Komitəsinə çağırılıb.
Detallar açıqlanmır.
Novator.az bildirir ki, 1962-ci il təvəllüdlü Andranik Piloyan uzun illər Ermənistan Silahlı Qüvvələrində qulluq edib, hərbi hissənin kəşfiyyat xidmətinin rəisi, batalyon komandiri, hərbi hissə komandirinin müavini-qərargah rəisi, hərbi hissə komandiri, hərbi birləşmə komandirinin müavini-qərargah rəisi, hərbi birləşmə komandiri postları tutub.
Birinci və İkinci Qarabağ müharibələrinin iştirakçısı, general-mayor, Ermənistanın Milli Qəhrəmanıdır.
Fövqəladə hallar naziri vəzifəsinə 2020-ci il noyabrın 20-də təyin olunub.
Ermənistan hökumətinə Vətəndaş Sazişi Partiyasının sədri Nikol Paşinyan başçılıq edir. O, baş nazir postuna 2018-ci il mayın 8-də xalq hərəkatı dalğasında gəlib.
