Azərbaycan rusiyalı deputatı beynəlxalq axtarışa verdi
Martın 30-da Baş Prokurorluq rəsmi məlumat yayıb. Qeyd olunur ki, Rusiya parlamentinin aşağı palatasının – Dövlət Dumasının deputatı, iqtisadi siyasət komitəsinin sədr müavini Mixail Delyagin martın 28-i “Rossiya 1” telekanalında yayımlanan verilişdə Azərbaycana qarşı təcavüzkar müharibəni başlamağa açıq çağırışlar edərək ölkənin enerji infrastrukturunun və neft sənayesinin məhvi üçün taktiki nüvə silahından istifadə təklif edib, sosial media platformasında bu barədə kütləvi sorğu keçirib: “Mixail Delyaginin əməllərində Cinayət Məcəlləsinin 101.2 (təcavüzkar müharibəni başlamağa açıq çağırışlar), 214.2.3 (terrorçuluq – odlu silahdan və silah qismində istifadə olunan predmetlərdən istifadə etməklə törədilməklə hədələdikdə), 283.2.1 və 283.2.2-ci (milli, irqi, sosial və ya dini nifrət və düşmənçiliyin salınması) maddələrinin tərkib əlamətləri olduğundan baş prokuror cinayət işi başlayıb, ibtidai istintaqın aparılması Baş Prokurorluğun İstintaq İdarəsinə həvalə olunub.
Martın 29-da Mixayıl Delyagin təqsirləndirilən şəxs qismində cəlb edilib, məhkəmənin qərarı ilə barəsində həbs qətimkan tədbiri seçilməklə İnterpol vasitəsilə beynəlxalq axtarışa verilib. Bir sıra tərəfdaş dövlətin səlahiyyətli orqanlarına təqsirləndirilən şəxsin həmin ölkələrin ərazisinə daxil olduqda dərhal tutularaq Azərbaycana verilməsinin təmin edilməsi məqsədilə müraciətlər göndərilib”.
1968-ci il təvəllüdlü Mixail Delyagin Dövlət Dumasında 28 deputatla təmsil olunan Ədalətli Rusiya Partiyasının üzvüdür.
