Milli Şuradan 3+ variantı
Demokratik Qüvvələrin Milli Şurası aprelin 2-si paytaxtda keçirmək istədiyi mitinq üçün rəsmən müraciət edib. Novator.az-ın məlumatına görə, Bakı Şəhər İcra Hakimiyyətinə martın 28-də təqdim olunan müraciətdə mitinqin saat 15-dən 17-dək keçirilməsi niyyəti yer alıb və üç məkan təklif olunub: metronun “İnşaatçılar” stansiyasının yaxınlığındakı stadion; metronun “Nəriman Nərimanov” stansiyasının yanındakı park; Ukrayna dairəsi.
Müraciətdə Bakı Şəhər İcra Hakimiyyətinin təklif edəcəyi başqa bir ünvanın müzakirə oluna biləcəyi də vurğulanıb.
Aksiyanın məqsədi Ukraynanın ərazi bütövlüyünə dəstəkdir.
2014-cü ildə Ukraynanın Krım yarımadasını tam, Donbas bölgəsini qismən işğal edən Rusiya 2022-ci il fevralın 21-də bu ölkəyə qarşı yeni təcavüzə başlayıb, fevralın 24-dən isə orada total hərbi əməliyyat aparır.
“Sərbəst toplaşmaq azadlığı haqqında” qanuna görə, toplantı – yığıncaq, mitinq, nümayiş, küçə yürüşü, piket formalarında ola bilər. Toplantıların hər hansı birini təşkil edən şəxs və ya şəxslər bu barədə müvafiq icra hakimiyyəti orqanını qabaqcadan yazılı surətdə xəbərdar etməlidirlər. Xəbərdarlıq müvafiq icra hakimiyyəti orqanının zəruri tədbirlər görməsi üçün onun yeri və vaxtının, küçə yürüşünün isə marşrutunun razılaşdırılması üçün toplantının keçiriləcəyi gündən azı 5 iş günü əvvəl təqdim edilməlidir.
Toplantı haqqında müvafiq icra hakimiyyəti orqanlarının qərarları tədbirin təşkilatçılarına onun keçirilməsinə azı 3 iş günü qalmış yazılı şəkildə çatdırılmalıdır.
2013-cü ildə yaradılmış Demokratik Qüvvələrin Milli Şurasına tarixçi alim Cəmil Həsənli sədrlik edir. Qurumun Koordinasiya Mərkəzində AXCP sədri Əli Kərimli, Müsavat Partiyasından Tofiq Yaqublu, sabiq deputat Gültəkin Hacıbəyli və başqa müxaliflər təmsil olunur.
