Fransa: kimin nə qədər səsi var?
Aprelin 10-u Fransada prezident seçkisinin ilk turu keçiriləcək. Novator.az-ın məlumatına görə, yerli “İpsos” şirkətinin yeni sorğusu ilk turda indiki dövlət başçısının önə çıxacağını göstərir. 24-28 martda 1723 respondentin iştirakı ilə aparılmış sorğunun nəticələrinə əsasən, Emmanuel Makron seçkinin ilk turunda 27,5% səs yığa bilər.
Marin Le Pen 18,5% səslə ikinci yerdə qərar tutur.
Sorğuya qatılanların 15,5%-i Jan-Lük Melanşona, 11,5%-i Erik Zemmura, 10%-i Valeri Pekresə dəstək verib.
Qalan namizədlər belə sıralanır:
Yannik Jado – 6%
Fabyen Russel – 3,5%
Ann İdalqo, Jan Vassal, Nikola Düpon-Enyan – hər biri 2%
Filipp Putu – 1%
Natali Arto – 0,5%.
Seçkinin ikinci turu aprelin 24-nə təyin edilib.
1977-ci il təvəllüdlü Emmanuel Makron 2016-cı ildə “İrəli, respublika!” hərəkatını yaradıb, 2017-ci il mayın 7-də prezident seçilib, mayın 14-də səlahiyyətlərinin icrasına başlayıb.
1968-ci il təvəllüdlü Marin Le Pen lideri olduğu Milli Birlik Partiyasının namizədidir. Parlamentin aşağı palatasının üzvüdür.
Fəthedilməz Fransa Partiyasının namizədi, 1951-ci il təvəllüdlü Jan-Lük Melanşon parlamentin aşağı palatasının üzvüdür.
İfrat millətçilərin namizədi olan 1958-ci il təvəllüdlü Erik Zemmur jurnalist və yazıçıdır.
1967-ci il təvəllüdlü Valeri Pekres seçkidə Respublikaçılar Partiyasını təmsil edir. O, İl-de-Frans bölgəsinin başçısıdır.
1967-ci il təvəllüdlü Yannik Jado Yaşıllar Partiyasından namizəddir. O, Avropa Parlamentinin üzvüdür.
Fabyen Russel seçkidə Kommunist Partiyasını təmsil edir. 1969-cu il təvəllüdlü Fabyen Russel parlamentin aşağı palatasının üzvüdür.
Ann İdalqonu Sosialist Partiyası namizəd göstərib. 1959-cu il təvəllüdlü Ann İdalqo paytaxt Parisin meridir.
1955-ci il təvəllüdlü Jan Vassal “Müqavimət Göstərək!” Partiyasının, 1961-ci il təvəllüdlü Nikola Düpon-Enyan “Qalx, Fransa!” Partiyasının, 1967-ci il təvəllüdlü Filipp Putu Yeni Antikapitalist Partiyasının, 1970-ci il təvəllüdlü Natali Arto Fəhlə Mübarizəsi Partiyasının təmsiçisidir.
Emmanuel Makron Fransanın 8-ci prezidentidir. Ondan əvvəl dövlət başçısı postunu Şarl de Qoll, Jorj Pompidu, Valeri Jiskar d’Esten, Fransua Mitteran, Jak Şirak, Nikola Sarkozi və Fransua Oland tutublar.
