Final mərhələsində artım
2022-ci ilin dünya futbol çempionatının final mərhələsinə çıxan komandaların sayı artıb. Novator.az bildirir ki, martın 28-də Şimali və Mərkəzi Amerikadan Kanadanın final raunduna adladığı bəlli olub. Bu zonadan daha 2 vəsiqəyə ABŞ, Meksika və Kosta Rikanın imkanları var.
Hər birinin 4 vəsiqəsi olan Cənubi Amerikadan Braziliya, Argentina, Ekvador və Uruqvay, Asiyadan Cənubi Koreya, İran, Yaponiya və Səudiyyə Ərəbistanı final mərhələsinə adlayıblar.
Avropaya ayrılan yerlərin 10-u tutulub: Serbiya, İspaniya, İsveçrə, Fransa, Belçika, Danimarka, Niderland, Xorvatiya, İngiltərə, Almaniya.
Qalan 3 vəsiqə uğrunda bu komandalar yarışır: Şotlandiya, Ukrayna, Uels; Polşa, İsveç; Şimali Makedoniya, Portuqaliya.
Afrikanı final mərhələsində 5 komanda təmsil edəcək. Həmin vəsiqələrə 10 namizəd var: Misir, Seneqal; Kamerun, Əlcəzair; Qana, Nigeriya; Konqo Demokratik Respublikası, Mərakeş; Mali, Tunis.
2 vəsiqə Asiya təmsilçisi ilə Cənubi Amerika təmsilçisi, Şimali və Mərkəzi Amerika təmsilçisi ilə Okeaniya təmsilçisi arasında əlavə oyunlarda müəyyənləşəcək.
2022-ci il noyabrın 21-dən dekabrın 18-dək Qətərdə keçiriləcək final raunduna 32 vəsiqənin 1-i ev sahibinə verilib.
1930-cu ildən keçirilən dünya çempionatlarında Braziliya 5 dəfə, İtaliya və Almaniya 4 dəfə, Uruqvay, Argentina və Fransa 2 dəfə, İngiltərə və İspaniya 1 dəfə qızıl medallara sahib olub.
