11 ölkə, 24 komanda
Avropanın klub turnirləri finiş xəttinə çıxır. Çempionlar Liqasında 1/4 final 5-13 aprelə, yarımfinal 26 aprel-4 maya, final 28 maya (Paris), Avropa Liqasında 1/4 final 7-14 aprelə, yarımfinal 28 aprel-5 maya, final 18 maya (Sevilya), Konfrans Liqasında 1/4 final 7-14 aprelə, yarımfinal 28 aprel-5 maya, final 25 maya (Tirana) təyin olunub.
2021-2022 mövsümündə klub turnirlərinə 55 UEFA üzvünün 237 komandası buraxılıb. Novator.az bildirir ki, mübarizəni 11 UEFA üzvünün 24 komandası davam etdirir: Çempionlar Liqası, Avropa Liqası və Konfrans Liqasının hər birində 8 komanda qalır.
Çempionlar Liqasında qalan komandaların 5-i titul sahibidir. 1955-ci ildən keçirilən, 1991-ci ilə qədər Çempionlar kuboku adı daşımış turniri “Real” 13, “Bavariya” və “Liverpul” 6, “Benfika” və “Çelsi” 2 dəfə zirvədə tamamlayıb.
Avropa Liqasındakı komandalardan yalnız 1-nin titulu var. 1971-ci ildən keçirilən, 2008-ci ilədək UEFA kuboku adlanmış turnirdə “Ayntraxt” (Frankfurt) 1 uğur qazanıb.
Konfrans Liqası 2021-ci ildən keçirilir.
Təmsilçisiz qalan Azərbaycan UEFA-nın klub reytinqində 26-cı pillədə göstərilir. Reytinq turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
2021-2022 mövsümünü Azərbaycan 4,375 əmsalla başa vurub. Ümumi əmsal 17,000-dir.
