Avropa Məhkəməsindən yeni təzminat qərarı
Martın 17-də Avropa İnsan Hüquqları Məhkəməsi azərbaycanlı hüquqşünas Vidadi İsgəndərlinin (İsgəndərov) şikayəti üzrə qərar elan edib. Aihmaz.org-un məlumatına görə, məhkəmə ərizəçinin Avropa İnsan Hüquqları Konvensiyası ilə qorunan hüququnun pozulduğu, məhkəməyə qədər əsassız həbs edildiyi qənaətinə gəlib. Qərara əsasən, Azərbaycan dövləti Vidadi İsgəndərliyə 3500 avro təzminat ödəməlidir.
Vidadi İsgəndərli 2011-ci ilin aprelindən 2012-ci ilin dekabrınadək seçki hüquqlarının həyata keçirilməsinə mane olma, seçki komissiyalarının işinə müdaxilə etmə, döymə ittihamları ilə həbsdə yatıb. Bir sıra yerli və beynəlxalq insan haqları qurumu onu vicdan məhbusu kimi tanıyıb.
Hazırda Fransada yaşayan Vidadi İsgəndərli Avropa Məhkəməsinə şikayətində saxlanma şəraitinin dözülməz, məhkəməyə qədər həbs edilməsinin, həbs müddətinin uzadılmasının qanunsuz olduğunu iddia etmişdi.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
