Arif Hacılı Ukrayna müzakirəsinə dəvət alıb
Müsavat Partiyasının başqanı Arif Hacılı Avropa Parlamentindəki Ukrayna müzakirəsinə dəvət alıb. Avropa İttifaqının baş şəhəri Brüsseldə martın 24-də keçiriləcək müzakirəni qitənin 70-dən çox siyasi partiyasını birləşdirən Avropa Liberal Demokrat İttifaqı qrupu təşkil edir. Arif Hacılı bəyan edib ki, texniki məsələləri həll etmək mümkün olsa, Brüsselə getmək niyyətindədir: “Əks halda Rusiyanın Ukraynaya təcavüzü mövzusu qoyulan həmin xüsusi toplantıya onlayn formatda qatılacağam”.
Avropa Parlamenti 27 ölkəni (Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan) birləşdirən Avropa İttifaqının qanunverici orqanıdır.
2014-cü ildə Rusiya Ukraynanın Krım yarımadasını zəbt edərək özünə birləşdirib, Donbas bölgəsinin bir hissəsində iki separatçı rejim qurub. 2022-ci il fevralın 21-də Rusiya “Donetsk Xalq Respublikası” və “Luqansk Xalq Respublikası” adları verilmiş həmin rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlara başlayıb. Ukrayna əraziləri işğal edilir, ölkənin hərbi və mülki obyektlərinə zərbələr endirilir, paytaxt Kiyev daxil olmaqla şəhərlər bombalanır.
