Blinken: “Müstəqil Ukraynanın ömrü Putinin ömründən uzun olacaq”
“Ukraynanın, müstəqil Ukraynanın ömrü Vladimir Putinin ömründən uzun olacaq. İstənilən halda Ukrayna mövcudluğunu davam etdirəcək, Putin isə günün birində olmayacaq”. Novator.az-ın məlumatına görə, ABŞ-ın dövlət katibi Entoni Blinken CNN kanalına müsahibəsində belə deyib.
Dövlət katibi qeyd edib ki, ABŞ Ukraynada müharibəni dayandırmağa, itkilərin, dağıntıların qarşısını almağa çalışır: “Biz bu istiqamətdə intensiv iş aparırıq. Hər gün Ukraynaya dəstək verməklə, Rusiyaya isə təzyiq göstərməklə təcavüzü dayandırmağa çalışırıq”.
Entoni Blinken müharibənin gözləndiyindən daha tez bitəcəyinə ümid etdiyini də vurğulayıb.
2014-cü ildə Rusiya Ukraynanın Krım yarımadasını zəbt edərək özünə birləşdirib, Donbas bölgəsinin bir hissəsində iki separatçı rejim qurub. 2022-ci il fevralın 21-də Rusiya “Donetsk Xalq Respublikası” və “Luqansk Xalq Respublikası” adları verilmiş həmin rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlara başlayıb. Ukrayna əraziləri işğal edilir, ölkənin hərbi və mülki obyektlərinə zərbələr endirilir, paytaxt Kiyev daxil olmaqla şəhərlər bombalanır.
Mənbə: CNN.com
