Fransa prezidentliyinə namizədlər
Fransada 2022-ci ilin prezident seçkisinə 12 namizəd qatılıb. Novator.az bildirir ki, ilk turu aprelin 10-na, ikinci turu aprelin 24-nə təyin edilmiş seçkidə indiki prezident Emmanuel Makron da yer alır. 1977-ci il təvəllüdlü Emmanuel Makron 2014-2016-cı illərdə Sosialist Partiyasının təmsilçisi kimi iqtisadiyyat, sənaye və rəqəmli texnologiyalar naziri postunu tutub. 2016-cı ildə “İrəli, respublika!” hərəkatını yaradıb, 2017-ci il mayın 7-də prezident seçilib, mayın 14-də səlahiyyətlərinin icrasına başlayıb.
Sosialist Partiyası Ann İdalqonu namizəd göstərib. 1959-cu il təvəllüdlü Ann İdalqo paytaxt Parisin meridir.
Respublikaçılar Partiyasını seçkidə 1967-ci il təvəllüdlü Valeri Pekres təmsil edir. O, İl-de-Frans bölgəsinin başçısıdır.
1968-ci il təvəllüdlü Marin Le Pen lideri olduğu Milli Birlik Partiyasının namizədidir. Parlamentin aşağı palatasının üzvüdür.
Fəthedilməz Fransa Partiyası seçkiyə lideri Jan-Lük Melanşonun namizədliyi ilə qatılıb. 1951-ci il təvəllüdlü Jan-Lük Melanşon parlamentin aşağı palatasının üzvüdür.
Kommunist Partiyasını seçkidə qurumun lideri Fabyen Russel təmsil edir. 1969-cu il təvəllüdlü Fabyen Russel parlamentin aşağı palatasının üzvüdür.
1967-ci il təvəllüdlü Filipp Putu Yeni Antikapitalist Partiyasının, 1970-ci il təvəllüdlü Natali Arto Fəhlə Mübarizəsi Partiyasının, 1961-ci il təvəllüdlü Nikola Düpon-Enyan “Qalx, Fransa!” Partiyasının, 1955-ci il təvəllüdlü Jan Vassal “Müqavimət Göstərək!” Partiyasının təmsilçisidir.
1967-ci il təvəllüdlü Yannik Jado Yaşıllar Partiyasından namizəddir. O, Avropa Parlamentinin üzvüdür.
İfrat millətçilərin namizədi olan Erik Zemmur 1958-ci ildə doğulub. Jurnalist və yazıçıdır.
Emmanuel Makron Fransanın 8-ci prezidentidir. Ondan əvvəl dövlət başçısı postunu Şarl de Qoll, Jorj Pompidu, Valeri Jiskar d’Esten, Fransua Mitteran, Jak Şirak, Nikola Sarkozi və Fransua Oland tutublar.
