Bayden Ukraynaya daha çox yardım vəd edir
ABŞ prezidenti Cozef Bayden Rusiya ilə mübarizədə Ukraynaya daha çox yardım göstəriləcəyini vəd edib.
Novator.az-ın məlumatına görə, Bayden “Tvitter” şəbəkəsində yaydığı açıqlamada Ukraynaya silah, pul, ərzaq və digər yardımların göndərilməsi prosesinin davam edəcəyini vurğulayıb: “Biz Ukraynanın Rusiya işğalından müdafiə olunmaq üçün silahlanmasının qayğısına qalacağıq. Ukraynalıların həyatını xilas etmək üçün onlara pul, ərzaq və başqa yardımlar göndərəcəyik”.
Bayden ukraynalı qaçqınlara xüsusi diqqət yetiriləcəyini də qeyd edib: “Biz ukraynalı qaçqınlara qucaq açacağıq”.
Hazırda Ağ ev Baydenin Avropa ölkələrinə səfərə çıxması məsələsini nəzərdən keçirir. Gözlənilən səfərin Rusiyanın Ukraynaya hücumu ilə bağlı olduğu şübhə doğurmur.
2014-cü ildə Rusiya Ukraynanın Krım yarımadasını zəbt edərək özünə birləşdirib, Donbas bölgəsinin bir hissəsində iki separatçı rejim qurub. 2022-ci il fevralın 21-də Rusiya “Donetsk Xalq Respublikası” və “Luqansk Xalq Respublikası” adları verilmiş həmin rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlara başlayıb. Ukrayna əraziləri işğal edilir, ölkənin hərbi və mülki obyektlərinə zərbələr endirilir, paytaxt Kiyev daxil olmaqla şəhərlər bombalanır.
