Davanın Azərbaycan fəsadı
London İqtisadiyyat Məktəbinin professoru, siyasətçi Qubad İbadoğlu Rusiyanın Ukraynaya total hərbi təcavüzünün, iqtisadi sanksiya dalğasının yaxın ölkələrə təsirindən yazıb. Novator.az-ın məlumatına görə, o qeyd edir ki, inflyasiyanın yüksək olduğu ölkələr daha güclü təsirə məruz qalacaq: “Azərbaycan MDB məkanında qiymətlərin ən çox artdığı ölkədir. Rusiya Azərbaycanın 3-cü, Ukrayna 7-ci əsas xarici ticarət tərəfdaşıdır. 2021-ci ildə Azərbaycan Ukraynaya 452,4 milyon dollarlıq mal göndərib, Ukraynadan 470 milyon 24 min dollarlıq mal alıb. Rusiyaya 920,8 milyon dollarlıq mal ixrac olunub, Rusiyadan Azərbaycana 2 milyard 74 milyon dollarlıq mal gətirilib.
Ukrayna ilə ticarət əlaqələrində tütün məmulatları və siqaretlər, ərzaq məhsulları, dərman preparatları üstünlük təşkil edir. 2021-ci ildə Rusiyadan Azərbaycana 293 milyon 235 min dollar məbləğində buğda, 100 milyon dollar məbləğində uzununa doğranmış meşə materialları, 46 milyon dollarlıq bitki yağları gətirilib. Deməli, bu üç məhsul Rusiyadan idxalın 20 faizindən çoxunu təşkil edir. Odur ki, Rusiya və Ukrayna ilə ticarət əlaqələrində yaranmış çətinlik ucbatından Azərbaycanda qiymət artımı daha çox ərzaq məhsullarında, o sıradan bitki yağlarında, çörək və un məmulatlarında, dərman preparatlarında, siqaretdə və tütün məmulatlarında müşahidə olunacaq”.
