Ermənistanın yeni prezidenti and içdi
Ermənistanın yeni prezidenti Vaahn Xaçaturyan martın 13-ü paytaxt Yerevanda, Karen Dəmirçyan adına İdman-Konsert Kompleksində and içərək səlahiyyətlərinin icrasına başlayıb.
Novator.az bildirir ki, 1959-cu il təvəllüdlü Vaahn Xaçaturyan iqtisadçıdır. “Razdanmaş” İstehsalat Birliyində çalışıb, “Mars” dövlət müəssisəsində baş direktorun müavini postunu tutub, paytaxt Yerevanın meri, Ermənistan prezidentinin müşaviri, parlamentin deputatı olub.
2000-ci ildən vətəndaş cəmiyyəti qurumlarında rəhbər vəzifələrdə işləyib, 2019-2021-ci illərdə bank sistemində fəaliyyət göstərib, 2021-ci il avqustun 4-də yüksək texnologiyalar sənayesi naziri təyin edilib.
2022-ci il yanvarın 23-də prezident Armen Sərkisyan istefa verib, fevralın 1-dən dövlət başçısı səlahiyyətləri parlamentin sədri Alen Simonyana keçib.
Martın 3-ü Ermənistan parlamentində keçirilən seçkidə yeganə iddiaçı olan hakim Vətəndaş Sazişi Partiyasının namizədi Vaahn Xaçaturyan dövlət başçısı postuna mandat alıb.
Vətəndaş Sazişi Partiyasına baş nazir Nikol Paşinyan sədrlik edir.
Səlahiyyət müddəti 7 il olan prezidentin parlamentin qəbul etdiyi qanunları imzalamaq, baş nazirin təqdimatı ilə Nazirlər Kabineti üzvlərini, xarici ölkələrdə və beynəlxalq təşkilatlarda diplomatik nümayəndələri, qoşunların ali komandan heyətini vəzifəyə təyin etmək, ali rütbələr vermək və başqa hüquqları var.
