Qaz istehsalı rəqəmlərdə
İqtisadçı Rövşən Ağayev təbii qaz istehsalı ilə bağlı statistikaya nəzər salıb. Novator.az-ın məlumatına görə, ekspert yazır ki, ABŞ son 10 ildə təbii qaz istehsalını təxminən iki dəfə artırmağa nail olmuş yeganə ölkədir: “Hazırda ABŞ həm öz istehlakını təmin edir, həm də dünya bazarlarına ildə 100 milyard kubmetr təbii qaz satır.
Son 10 ildə Niderland və Böyük Britaniyada qaz istehsalının sürətlə azalması nəticəsində Avropada qaz istehsalı təxminən 100 milyard kubmetr azalıb. Amma bu müddətdə alternativ enerjiyə keçid, enerji qənaəti texnologiyalarının tətbiqi nəticəsində Avropa üzrə qaz istehlakı da təxminən 80 milyard kubmetr düşüb. Avropada təməl enerji növlərinin məcmu istehlakı 10 ildə 10 faiz enib. İqtisadi böyümənin dayanmadığı şəraitdə enerji istehlakında azalma məhz enerji qənaəti texnologiyaları sayəsində baş verir.
Qaz istehsalını son 10 ildə sürətlə artıran ölkələrdən biri də İrandır. Bu ölkə 10 ildə istehsalı 60 faizə yaxın artırmaqla 150 milyard kubmetrdən 250 milyard kubmetrə çatdırıb. Ancaq İran hələ də nəhəng qaz potensialının çox az hissəsini hasilat mərhələsinə gətirə bilir. Beynəlxalq Enerji Agentliyinin məlumatına görə, Rusiya və İranın hər ikisinin təsdiqlənmiş qaz ehtiyatları 40 trilyon kubmetrə yaxındır. Lakin Rusiya daha effektiv enerji və sərmayə siyasəti nəticəsində İrandan 2,5 dəfə çox təbii qaz istehsal edir. Rusiya ümumi istehsalının təxminən 30 faizini (250 milyard kubmetrə yaxın) ixrac edir, İran isə öz istehsalının cəmi 7-8 faizini (20 milyard kubmetrdən az) ixraca yönəldə bilir”.
