Zelenski: “Onda gec olacaq…”
Böyük Britaniyanın “Sky News” kanalının əməkdaşı Kiyevdə Ukrayna prezidenti Vladimir Zelenskidən müsahibə götürüb.
Novator.az-ın məlumatına görə, müsahibə zamanı Zelenski bir daha Qərb dövlətlərini Ukraynanın səmasını bağlamağa çağırıb.
O deyib ki, Rusiyanın aviasiya zərbələri ilə törətdiyi və törədəcəyi kütləvi qırğınların qarşısını almağın yeganə yolu budur.
Zelenski xatırladıb ki, Qərb Ukrayna səmasını Rusiya ilə birbaşa hərbi toqquşmadan çəkindiyinə görə nəzarətə götürməkdən imtina edir. Ukrayna prezidenti bu mövqenin yanlış olduğunu vurğulayıb. Bildirib ki, belə getsə, Qərb onsuz da səmanı bağlamaq məcburiyyətində qalacaq, amma onda daha gec olacaq, çünki həmin vaxt Ukrayna milyonlarla insan itirmiş, yer üzündə isə artıq üçüncü dünya müharibəsi başlanmış olacaq.
2014-cü ildə Rusiya Ukraynanın Krım yarımadasını zəbt edərək özünə birləşdirib, Donbas bölgəsinin bir hissəsində iki separatçı rejim qurub. 2022-ci il fevralın 21-də Rusiya “Donetsk Xalq Respublikası” və “Luqansk Xalq Respublikası” adları verilmiş həmin rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlar aparır.
