Rusiyadan ixrac yasağı Azərbaycanı necə vurur?
Ukraynaya total hərbi təcavüz üzündən ağır iqtisadi sanksiyalara məruz qalan Rusiyada bir çox məhsulun ölkədən çıxarılması qadağan edilir. Yasaq 2022-ci ilin sonuna qədər qüvvədə olmalıdır.
Novator.az-ın məlumatına görə, ixrac məhdudiyyətini şərh edən London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu yazır ki, Rusiya Azərbaycanın idxalda əsas tərəfdaşıdır: “2021-ci ildə Rusiyadan Azərbaycana məhsul ixracı 2 milyard dolları üstələyib. İdxal məhsulları arasında taxıl ilk sırada olub. 2019-cu ilin statistikasına əsasən, Azərbaycana gətirilən taxılın 82 faizi, günəbaxan yağının 100 faizi, kartofun 64,5 faizi, hazır şəkərin 99 faizi, düyünün 21,5 faizi, ətin 8,2 faizi, süd məhsullarının 9,8 faizi, mineral gübrələrin 86,7 faizi, yem xammalının 36,5 faizi Rusiyanın payına düşür.
Dünya Ticarət Təşkilatına üzvlükdən israrla imtina edən Azərbaycan öz bazarını Rusiya malları ilə doldurur.
Azərbaycanın kənd təsərrüfatı məhsullarının ixracında əsas bazar Rusiyadır. 2019-cu ildə pomidorun 99,6 faizi, fındığın 46,6 faizi, faraş kartofun 92,6 faizi, digər tərəvəzlərin 85,3 faizi Rusiyaya ixrac olunub. İxrac və idxalda ölkələr üzrə şaxələndirmə zərurəti barədə çox yazsaq da, hökumət siyasi arqumentləri önə çəkirdi. İndi məhz həmin siyasi səbəblərdən Azərbaycan istehlakçıları və istehsalçıları çətinliklərə düçar olurlar.
Rusiyanın ixraca məhdudiyyəti Azərbaycan idxalatçılarını və ixracatçılarını yeni bazarlar axtarışına məcbur edəcək. Bu asan olmayacaq, xeyli zaman aparacaq və baha məhsul idxalına gətirib çıxaracaq, son nəticədə istehlak bazarında qiymətlər yüksələcək”.
