Partiyaların gəlir-çıxarı
Mərkəzi Seçki Komissiyasına 2021-ci ilin maliyyə hesabatını verən siyasi partiyaların sayı 14-ə çatıb. Novator.az bildirir ki, onların 4-ü Milli Məclis partiyasıdır.
3 deputatı olan Vətəndaş Həmrəyliyi Partiyasının hesabatına görə, qurum dövlət büdcəsindən 256 min 14,7 manat əldə edib. Partiyanın xərcləri 276 min 561,8 manat göstərilir.
1 deputatı olan Demokratik İslahatlar Partiyasının hesabatında dövlət büdcəsindən 206 min 283,6 manat vəsait alındığı qeyd edilir. Sənədə görə, partiyanın 209 min 587,9 manat xərci çıxıb.
1 deputatı olan Demokratik Maarifçilik Partiyasının hesabatında dövlət büdcəsindən quruma 206 min 283,6 manat ayrıldığı qeyd edilir, xərclər 202 min 745,3 manat göstərilir.
1 deputatı olan Böyük Quruluş Partiyasının hesabatına görə, dövlət büdcəsindən 206 min 283,6 manat alınıb, üzvlük haqqı üzrə 115 manat gəlir olub, müxtəlif istiqamətlərə 195 min 809,9 manat xərclənib.
Ədalət Partiyasının hesabatında 1463,9 manat ianə əldə edildiyi, həmin vəsaitin cari işlərə sərf olunduğu bildirilir.
Azərbaycan Xalq Partiyasının hesabatında bildirilir ki, qurum 660 manat ianə əldə edib, həmin vəsait partiyanın saxlanmasına və informasiya təminatına xərclənib.
Vətəndaş və İnkişaf Partiyasının hesabatında 200 manat ianə əldə olunduğu, həmin vəsaitin cari işlərə sərf edildiyi bildirilir.
Müstəqil Xalq Partiyasının hesabatına əsasən, hər hansı gəlir olmayıb, qurumun saxlanmasına və informasiya təminatına 590 manat xərclənib.
Azərbaycan Naminə Alyans Partiyası, Liberal Partiyası, Respublikaçılar Partiyası, Tərəqqi Partiyası, Milli Dirçəliş Hərəkatı Partiyası, Müasir Müsavat Partiyasının hesabatlarında 2021-ci ildə hər hansı gəlir və xərclərinin olmadığı göstərilir.
Siyasi partiyalar hər il aprelin 1-dək Mərkəzi Seçki Komissiyasına illik maliyyə hesabatı verməlidir.
Ədliyyə Nazirliyində 58 siyasi partiya dövlət qeydiyyatına alınıb. Onların 11-i parlamentdə təmsil olunur və dövlət büdcəsindən vəsait almaq hüquqları var.
