Avropanın qaz planı
Avropa İttifaqı Rusiyadan enerji asılılığını aradan qaldırmaq planını açıqlayıb. Novator.az-ın məlumatına görə, iqtisadçı Rövşən Ağayev yazır ki, Beynəlxalq Enerji Agentliyi Rusiyadan alınan təbii qazın həcmini 2022-ci ilin sonuna qədər 50 milyard kubmetr azaltmağı mümkün saydığını açıqlayıb: “Avropa İttifaqı ekspertləri isə yaxın 9 ayda Rusiyadan qaz asılılığını 100 milyard kubmetrə yaxın azaldılmasının mümkün olduğunu düşünür. Ekspertlər imtina olunacaq Rusiya qazının alternativləri kimi üç mənbə göstərir: 50 milyard kubmetr yeni maye qaz müqavilələri hesabına; 10 milyard kubmetr Əlcəzair, Azərbaycan və Norveçdən idxal hesabına; 35 milyard kubmetr qənaət və alternativ enerji istehsalının artırılması hesabına.
Çox qısa zaman üçün iddialı hədəfdir. Planın nə dərəcədə real olduğu ilin sonunda görünəcək. Aprel ayında Avropa İttifaqının yeraltı qaz anbarları ilə bağlı öhdəliyi təsdiqlənəcək. Öhdəliyə əsasən, oktyabrın 1-dək anbarların doluluq səviyyəsi 90 faizə çatmalıdır”.
Avropa İttifaqı 27 ölkəni (Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan) birləşdirir. Qitə bazarına Rusiya ildə orta hesabla 160-170 milyard kubmetr təbii qaz göndərir. Bu həcm Avropanın bütün istehlakının təxminən üçdə birinə bərabərdir.
