Rusiyadakı azərbaycanlılara məsləhətlər
London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu Ukraynaya total təcavüz fonunda ağır iqtisadi sanksiyalar altına düşən Rusiyada yaşayan azərbaycanlılara iqtisadi məsləhətlər verib. Novator.az-ın məlumatına görə, məsləhətlər belə sıralanır:
– pulunuzu rublda yalnız cari xərcləriniz qədər saxlayın;
– sərbəst vəsaitləriniz varsa, onları ya xarici valyutaya, ya qızıla çevirin, ya idxal malları (avtomobil, elektronika, məişət avadanlıqları) alın, ya da ən pis variantda vəsaiti Rusiyanın tanınmış şirkətlərinin ucuzlaşan səhmlərinə yerləşdirin;
– evinizdə ehtiyat yaradın, uzun müddət saxlana bilən, tez xarab olmayan ərzaq və məişət məhsullarını topdan satış qiyməti ilə alın;
– sabit xərclərinizi, məsələn, kirayə haqlarını, kommunal xərcləri və başqa məsrəfləri əvvəlcədən bir neçə aylıq və ya illik ödəyin;
– sanksiya altına düşən banklarda, xüsusilə də cari və hesablaşma hesablarında rublla çox pul saxlamayın, depozitlərinizi geri götürün və sərfəli istiqamətlərə yönəldin;
– iş sahəsində, xüsusilə də inşaat və sənaye sektorunda böyük öhdəliklər yaradan yeni layihələri dəyəri əvvəlcədən ödənmək və büdcəsi öncədən təsdiq olunmaq şərti ilə götürməyin, çünki bir müddətdən sonra mal və xidmətlərin bahalaşması ayrılan büdcə hesabına götürdüyünüz işi başa çatdırmağa imkan verməyəcək;
– saxlana bilən mallarınızı tez satmağa çalışmayın, sonra görəcəksiniz ki, topdan aldığınız mal sizin pərakəndə satış qiymətinizdən bahadır;
– əmlak bazarına sərmayə qoymağa tələsməyin, bu bazarda qiymətlər xeyli düşəcək.
