Hansı partiyalar maliyyə hesabatı verib?
Siyasi partiyalar hər il aprelin 1-dək Mərkəzi Seçki Komissiyasına illik maliyyə hesabatı verməlidir. Novator.az bildirir ki, martın 9-dək Mərkəzi Seçki Komissiyasının saytında 8 siyasi partiyanın 2021-ci il üzrə maliyyə hesabatı yer alır. Azərbaycan Naminə Alyans Partiyası, Liberal Partiyası, Respublikaçılar Partiyası, Tərəqqi Partiyası və Milli Dirçəliş Hərəkatı Partiyasının hesabatlarında 2021-ci ildə hər hansı gəlir və xərclərinin olmadığı göstərilir.
Ədalət Partiyasının hesabatında 1463,9 manat ianə əldə edildiyi, həmin vəsaitin cari işlərə sərf olunduğu bildirilir.
Milli Məclisdə 3 deputatla təmsil olunan Vətəndaş Həmrəyliyi Partiyasının hesabatına görə, 2021-ci ildə qurumun 256 min 14,7 manat gəliri olub. Bu, dövlət büdcəsindən ayrılan vəsaitdir. Partiyanın 2021-ci il xərcləri 276 min 561,8 manat göstərilir.
Parlamentdə 1 deputatı olan Demokratik İslahatlar Partiyasının hesabatında 2021-ci ildə dövlət büdcəsindən 206 min 283,6 manat vəsait alındığı qeyd edilir. Partiyanın 2021-ci il üzrə xərcləri isə 209 min 587,9 manat olub.
Ədliyyə Nazirliyində 58 siyasi partiya dövlət qeydiyyatına alınıb. Onların 11-i parlamentdə təmsil olunur və dövlət büdcəsindən vəsait almaq hüquqları var.
