Rubl ilin ən aşağı qiymətində
Azərbaycan Mərkəzi Bankı martın 2-də 100 Rusiya rublunu banklara 1 manat 55 qəpiyə satır. Novator.az bildirir ki, bu, 2022-ci ilin ən aşağı rəsmi məzənnəsidir.
Rubl Ukraynaya hərbi təcavüzə görə dünya birliyinin Rusiyaya tətbiq etdiyi sanksiyalar üzündən dəyər itirir.
2022-ci il 100 Rusiya rublu üçün 2 manat 25 qəpik rəsmi məzənnə ilə başlayıb. Yanvar ayında minimum kurs 2 manat 14 qəpik göstərilib.
Fevrala 100 Rusiya rublu 2 manat 22 qəpiklə qədəm qoyub, ay 1 manat 57 qəpiklə bitib.
2014-cü ildə Ukraynada hakimiyyətə Qərbə yaxın qüvvələr gələndən sonra Rusiya ölkənin Krım yarımadasını zəbt edərək özünə birləşdirib, həmçinin Donbas bölgəsində iki separatçı rejim – “Donetsk Xalq Respublikası” və “Luqansk Xalq Respublikası” qurub.
2022-ci il fevralın 21-də Rusiya “Donetsk Xalq Respublikası” və “Luqansk Xalq Respublikası”nı müstəqil dövlətlər kimi tanıyıb, hər iki rejimlə dostluq və qarşılıqlı yardım haqqında müqavilələr imzalayıb. Fevralın 24-də isə Rusiya prezidenti Vladimir Putin Ukraynada hərbi əməliyyatlara əmr verib. Həmin gündən Ukrayna torpağında qanlı döyüşlər gedir.
