Manat nə qədər dollar aparıb?
Dövlət Neft Fondu Mərkəzi Bankın 2022-ci ilin fevral ayında keçirdiyi valyuta hərraclarında 371,2 milyon ABŞ dolları məbləğində vəsait satıb. Rəsmi hesabat martın 2-də yayılıb.
Novator.az bildirir ki, iki ayın ümumi satış həcmi 1 milyard 98,2 milyon dollardır. Fond yanvarın hərraclarında 727 milyon dollar sərf etmişdi.
2015-ci ilin devalvasiyalarında ABŞ dollarının rəsmi kursu 0,7844 manatdan 1,5594 manata yüksəlib, 2016-cı ildə qiymət 1,7707 manata çatıb. 2017-ci ili 1,7001 manatla yola salan dollar 2018-ci il martın 7-dən banklara 1,7 manata təklif olunur.
Manatın sabitliyi valyuta hərraclarında qorunur. 2016-cı ilin hərraclarında Dövlət Neft Fondundan 4,9 milyard, 2017-ci ilin hərraclarında 3,6 milyard, 2018-ci ilin hərraclarında 6,5 milyard, 2019-cu ilin hərraclarında 6,6 milyard, 2020-ci ilin hərraclarında 7,3 milyard, 2021-ci ilin hərraclarında 6,7 milyard dollar alınıb.
