Eldar Həsənovun övladları prezidentə müraciət ediblər
Dövlət xadimi Eldar Həsənovun övladları Səbinə Hüseynova, Emilya Qurbanova və Anar Həsənov prezident İlham Əliyevə müraciət ediblər.
Novator.az-ın məlumatına görə, müraciətdə deyilir:
– Çox hörmətli cənab Prezident, Müzəffər Ali Baş Komandan!
Bu müraciəti Sizə 28 il yaxından tanıdığınız, Sizə sadiq olan Eldar Həsənovun övladları olaraq göz yaşları içində yazmağa məcburuq. Allah heç bir kimsəyə bizim çəkdiyimiz əzabları, iztirabları, göz yaşlarını, ah-naləni qismət etməsin.
Atamızın 28 ildə heç vaxt heç bir tərəddüd etmədən göstərdiyi xidmətlər, gördüyü işlər hamıdan çox Sizə daha yaxşı məlumdur. Məruz qaldığı ədalətsizliklərə, zülmlərə, təqiblərə, ayrı-seçkiliyə baxmayaraq məhkəmədə son sözündə ömrünün sonuna qədər sədaqətli qalacağını bildirən insana ağlımıza, yuxumuza belə gəlməyən, layiq olmadığı ən ağır cəza verildi.
Əgər həqiqətən atamız milyonlar mənimsəmişdisə, niyə biz – üç övladdan ikisi gəldiyimiz gündən bəri Türkiyədə kirayədə yaşayırıq? Niyə heç birimizin bir dənə də olsun şəxsi maşınımız yoxdur? Niyə illərdir ki, biz övladlar və ailə üzvlərimiz iki yerdə, bəzilərimiz isə üç yerdə çalışırıq? Niyə Bakıda müsadirə olunan 2-3 otaqlı mənzillərimizdən illərdir ki, heç birində təmir belə aparılmayıb, hamısı uçub-dağılmış vəziyyətdədir? Bunların hamısını baxış keçirən istintaq işçiləri öz gözləri ilə görəndə təəccüblərini, mənəvi əzab çəkdiklərini açıq dilə gətirdilər. Əgər milyonlar mənimsənilirdirsə, nədən ailəmizin Azərbaycanda, çalışdığımız Türkiyədə bir ticarət obyekti yoxdur?! Yeri gəlmişkən bildiririk ki, bizim – hər üç övladın atamızın səfir kimi fəaliyyəti ilə heç bir əlaqəsi olmayan, 20-30 il bundan əvvəl vicdanlı vətəndaş kimi öz adımıza aldığımız əmlakların üzərinə qanunsuz həbs qoyuldu, müsadirə olundu.
Amma biz övladlar bundan məyus deyilik, dünya malı dünyada qalır, biz heç vaxt ərkəsöyün böyüməmişik. Allah Ulu Öndərimiz Heydər Əliyevə qəni-qəni rəhmət eləsin! Onun məsləhəti, təşəbbüs və xeyir-duası ilə Bakıda, Böyük Britaniyada, İsveçrədə təhsil almışıq. Üç övladdan ikimiz elmlər doktoru, birimiz isə elmlər namizədiyik (beynəlxalq hüquq, tibb, iqtisad sahələri üzrə).
Möhtərəm cənab Prezident!
Sizə çox məlumatlar verə bilərlər, hətta Sizi qəzəbləndirən məlumatları da qisas almaq üçün xüsusi olaraq hazırlayıb təqdim edə bilərlər. Amma Siz çox təcrübəli, müdrik insansınız, böyük siyasətçisiniz, dərin təhlil qabiliyyətiniz var. İkinci Qarabağ müharibəsində bizim də doğma yurdumuz Kəlbəcər rayonu daxil olmaqla 30 il işğal altında olan əzəli torpaqlarımızı qəhrəmancasına azad edərkən bunun əyani şahidi olduq. Bu gün də bu uğurlara söykənərək yeni Azərbaycan qurursunuz. Buna görə Sizə dünyalar qədər minnətdarıq. Əfsuslar olsun, Birinci Qarabağ müharibəsində Qazaxdan Naxçıvanadək var gücü ilə çalışan, müharibədə iştirak edən atamız bu sevinci həbsdə yaşadı. Hətta saxlanıldığı həbs yerindən Sizə təbrik və minnətdarlıq məktubları göndərdi.
Biz övladlar olaraq gənc yaşlarımızdan bu günə qədər atamızın bizə aşıladığı Heydər Əliyev siyasi xəttinə sadiq olmuşuq. Bu gün də bu düşüncədə, bu əqidədəyik.
Möhtərəm cənab Prezident!
Atamız haqqında Sizə qisas almaq məqsədilə yalan, uydurma, şər-böhtan xarakterli məlumatı verməklə həbsinə nail olanlar bizə məlumdur. Baxmayaraq ki, onlar hər vasitə ilə bizə çatdırırlar ki, onlarlıq bir məsələ yoxdur, ən yüksək səviyyədə verilmiş göstərişdir, biz sadəcə icraçıyıq və elə düşünürlər ki, biz də bu nağıllara inanırıq. Yeri gəlmişkən, son 15 ildə Azərbaycanda həbs olunan, tanınan hər kəslə bağlı bu standart ifadələri elə Sizin rəhbərliyiniz altında çalışan bəzi insanlar bilərəkdən yayır. Bunu da bilməyinizdə fayda var. Nəticədə 13 avqust 2020-ci ildə atamız Xarici İşlər Nazirliyi ilə bağlı başlanmış cinayət işi üzrə həbs olundu. Az bir müddət sonra həmin iş üzrə həbs olunan bütün şəxslər azadlığa buraxıldı (Allah hamısının qapısını açıq eləsin), ancaq yaşca (8 il fərqlə) onlardan böyük olan, yəni içərilərində ən yaşlısı, 67 yaşlı atamız bu günə qədər həbsdədir. Azərbaycanın xarici ölkələrdə 78 səfirlik və diplomatik nümayəndəliyi olsa da, yalnız Avropada ən az büdcəsi olan səfirliyin – atamızın çalışdığı səfirliyin 20 illik fəaliyyəti yoxlanıldı.
Ailəmizin, qohum-əqrəbalarımızın, yaxınlarımızın hamısının evlərində prokurorluq və məhkəmə qərarları ilə axtarışlar aparıldı, 38 nəfər barəsində İnterpola, Beynəlxalq Maliyyə Kəşfiyyatına, atamızın çalışdığı 4 ölkənin və bizim yaşadığımız ölkələrin müvafiq dövlət orqanlarına məktublar, sorğular göndərildi. Nəticədə istər atamızla, istərsə də bizimlə – ailə üzvləri, qohum-əqrəba ilə bağlı bir dənə də olsun qanunazidd əməl, fakt aşkar olunmadı. Heç bir müqavilə-kontrakda, bank-maliyyə sənədlərində imzası olmayan, əleyhinə heç bir şahid ifadəsi olmayan bir insan barəsində günahsız olduğuna baxmayaraq hansısa mötəbər sübutlara yox, ehtimal və mülahizələrə əsasən çox amansız bir hökm oxundu.
Əminik ki, bütün bunları qorxularından Sizdən gizlədirlər. Məhz buna görə də atamız ayrı-seçkiliyə, ədalətsizliyə, qanunsuzluğa məruz qalaraq bu gün də həbsdədir.
Möhtərəm cənab Prezident!
Yüksək diqqətinizə çatdırırıq ki, atamız son 5 ildə 7 ağır cərrahi əməliyyat keçirib. Həbsdə olduğu müddətdə sağalması mümkün olmayan paroksizmal vertiqo xəstəliyinə düçar olub. O, üç dəfə Dövlət Təhlükəsizlik Xidmətinin Hərbi Hospitalına aparılıb və orada əməliyyat olunmasına baxmayaraq prokurorluğun göstərişi əsasında müayinə və müalicəsi yarımçıq saxlanılaraq istintaq təcridxanasına qaytarılıb. Son 5 aydır ki, qoyulmuş qadağalara görə heç bir həkim müayinə və müalicə üçün yanına buraxılmır. 67 yaşında ağır xəstəlikləri, şiddətli ağrıları olan, gündəlik 31 dərman qəbul edən bir insana belə qeyri-insani, qeyri-humanist, amansız, qəddar münasibət olarmı?! Düşünün, sivil dünyanın hansı ölkəsində belə bir hal ola bilər?! Bunların hamısını Sizdən gizlədirlər.
Anamız Elmira Həsənova 5 aydır ki, ağır xəstəlikdən Türkiyədə xəstəxanadadır. Hər gecə birimiz yanında qalırıq, övladlar olaraq bilmirik kimin yanında olaq, kimə dərmanları tez çatdıraq, kimə hansı köməyi edək! Bunlar bizim övlad kimi müqəddəs borcumuzdur, amma biz yaşadıqlarımızı Allah heç kimə qismət etməsin.
Ona görə də Sizə müraciətimizi başlayanda “göz yaşları içində” ifadəsini işlədəndə həqiqəti söyləyirik. Hələ onu demirik ki, bir qardaşımız var, onun toyu, bizim övladların elçiliyi, nişanı hamısı dayandırılıb. İl yarımdır ki, yas içindəyik.
Möhtərəm cənab Prezidentimiz!
Məhkəmədə atamız son sözündən sonra ailə üzvlərinə, qohum-əqrəbasına, yaxınlarına, vəkillərinə KİV-də və sosial şəbəkələrdə onunla bağlı hər hansı bir çıxışa, müraciətə, müzakirəyə, müsahibəyə qəti qadağa qoydu. Bu günə qədər də, sağ olsunlar, hər kəs o ağsaqqal sözünə riayət edir. Ona görə də bilmirik ki, bizim sifarişli poçtla göndərdiyimiz bu müraciətin Sizə çatmasına imkan verəcəklərmi? Ümid edirik ki, bu dəfə mane olmayacaqlar. 19-cu aydır ki, çoxsaylı ərizə və müraciətlərimizə heç bir dövlət qurumundan bir kəlmə də olsun nə yazılı, nə şifahi cavab verən olub, heç kim bizi qəbul etməyib.
İndi bir anlığa təsəvvür edin bizim düşdüyümüz vəziyyəti, bir vətəndaş kimi bizə olan münasibəti. Ona görə də Allahdan sonra tək ümid yerimiz, inam yerimiz Sizsiz, cənab Prezident.
Atamızın apellyasiya şikayətinə Novruz bayramı ərəfəsində baxılacaq. Allah qorusun, Sizin də ləyaqətli 3 övladınız var. Uca Tanrımız heç vaxt onlara ağır gün qismət etməsin, həmişə üzləri gülsün!
Biz üç övladın yaşadıqlarını, düşdüyümüz ağır durumu, ata-ana ah-naləsini, fəryadını nəzərə alıb ağır xəstə olan 67 yaşlı atamızı həbsdən azad etməyinizi Sizdən çox xahiş edirik. Bəlkə xəstəxanalarda onu müalicə etdirməklə həyata qaytara bilərik.
Redaksiyadan:
2020-ci il avqustun 13-dən həbsdə olan Eldar Həsənov Rumıniya, Serbiya, Bosniya və Herseqovina, Monteneqroda səfir kimi fəaliyyət göstərdiyi 2010-2020-ci illərdə maliyyə pozuntularına yol verməkdə təqsirli bilinir. İbtidai istintaqı əvvəlcə Dövlət Təhlükəsizliyi Xidməti, sonra Baş Prokurorluğun İstintaq İdarəsi aparıb. Həbs olunduğu gündən Dövlət Təhlükəsizliyi Xidmətinin istintaq təcridxanasında saxlanan Eldar Həsənov 2021-ci il sentyabrın 3-dən Bakı Ağır Cinayətlər Məhkəməsində mühakimə olunub. 2022-ci il yanvarın 21-də Eldar Həsənova 10 il müddətinə azadlıqdan məhrumetmə cəzası kəsilib. Hökm Eldar Həsənovun 3 il müddətinə dövlət və yerli özünüidarəetmə orqanlarında rəhbər və maddi məsul vəzifə tutma hüququndan məhrum olunmasını, ona məxsus olduğu iddia edilən bəzi əmlakların müsadirəsini də nəzərdə tutur.
İttihamı qəti şəkildə rədd edən Eldar Həsənov cinayət işini və həbsini təqib, çox böyük qanunsuzluq, haqsızlıq, ədalətsizlik və sifariş kimi qiymətləndirir.
Eldar Həsənov 1955-ci il oktyabrın 10-da Kəlbəcərin Laçın kəndində doğulub. Bakıda indiki Azərbaycan Texniki Universitetini elektronika mühəndisi ixtisası, Moskvada SSRİ Daxili İşlər Nazirliyinin Akademiyasını hüquqşünas ixtisası ilə bitirib.
1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.
1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.
2001-ci ildən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu ildən ölkəni həmçinin Serbiyada, 2010-cu ildən eyni zamanda Monteneqro, Bosniya və Herseqovinada təmsil edib. 2013-cü ildən onun Rumıniyadakı təmsilçiliyinə xitam verilib. 2020-ci il avqustun 17-də Eldar Həsənov Serbiya, Monteneqro, Bosniya və Herseqovinadakı səfir vəzifəsindən azad edilib.
Eldar Həsənov hüquq elmləri doktoru, professordur.
“İgidliyə görə” medalı, “Azərbaycan Bayrağı” və 3-cü dərəcəli “Vətənə xidmətə görə” ordenləri ilə təltif olunub.
Eldar Həsənovun iki qızı, bir oğlu, altı nəvəsi var.
