Rusiya futbol ailəsindən qovulur
Rusiyanın milli futbol komandası 2022-ci ilin dünya çempionatının final raunduna çıxmaq imkanını itirib. Bu, ali futbol qurumu FİFA-nın Ukraynaya hərbi təcavüz fonunda tətbiq etdiyi sanksiyanın nəticəsidir. FİFA fevralın 28-də Rusiyanı beynəlxalq turnirlərdə iştirak hüququndan məhrum edib.
Novator.az bildirir ki, 2022-ci ilin dünya çempionatının final mərhələsi 21 noyabr-18 dekabrda Qətərdə keçiriləcək. Finala 32 vəsiqənin 13-ü Avropanındır. 10 yer tutulub. Qalan 3 vəsiqənin 1-i Rusiyanın da buraxıldığı yarımfinal və final oyunlarının qalibinə ayrılmışdı. Rusiya martın 24-də Polşanı qəbul etməli, bu cütlüyün qalibi martın 29-da İsveç – Çexiya cütlüyünün qalibi ilə görüşməli idi. 28 fevral qərarı Polşanı yarımfinal cütünün qalibi elan edir.
Fevralın 28-də Avropanın ali futbol qurumu da Rusiyaya sanksiya tətbiq edib. UEFA Avropa Liqasının 1/8 finalında mübarizə aparan Moskva “Spartak”ını turnirdən kənarlaşdırıb. Martın 10-17-də keçiriləcək 1/8 final oyunlarında “Spartak” Almaniyanın “Leypsiq” komandası ilə üz-üzə gəlməli idi.
