Avropa İttifaqının tarixi
Rusiyanın total hərbi təcavüzünə məruz qalan Ukrayna fevralın 28-də Avropa İttifaqına qoşulmaq üçün rəsmi ərizə verib.
Novator.az bildirir ki, Ukrayna Avropa İttifaqına Şərq tərəfdaşlığı proqramı və assosiasiya sazişi ilə bağlıdır, bir neçə ildir üzvlüyə namizəd olmağa çalışır. İndi Ukrayna Avropa İttifaqından üzvlük məsələsinin sürətli həllini istəyir.
Avropa İttifaqının 27 üzvü var.
Qurumu Belçika, Fransa, İtaliya, Qərbi Almaniya, Lüksemburq və Niderland 1957-ci ildə Avropa İqtisadi Birliyi kimi yaradıb.
1973-cü ildə Böyük Britaniya, Danimarka və İrlandiya, 1981-ci ildə Yunanıstan, 1986-cı ildə İspaniya və Portuqaliya Avropa İqtisadi Birliyinə qoşulub.
1990-cı ildə Şərqi Almaniya və Qərbi Almaniya vahid Almaniya dövlətində birləşib.
1992-ci ildə Avropa İqtisadi Birliyinin əsasında Avropa İttifaqı təsis olunub.
1995-ci ildə Avstriya, Finlandiya və İsveç Avropa İttifaqına qəbul edilib.
2004-cü ildə Çexiya, Estoniya, Kipr, Latviya, Litva, Macarıstan, Malta, Polşa, Slovakiya və Sloveniya Avropa İttifaqına qoşulub.
Bolqarıstan və Rumıniya 2007-ci ildən, Xorvatiya 2013-cü ildən Avropa İttifaqının üzvüdür.
Böyük Britaniya 2020-ci ildə Avropa İttifaqını tərk edib.
Albaniya, Monteneqro, Serbiya, Şimali Makedoniya və Türkiyə Avropa İttifaqı üzvlüyünə namizəd statusundadır.
Quruma üzvlük üçün Bosniya və Herseqovina ilə Kosovo da danışıqlar aparır.
Azərbaycan, Ermənistan, Gürcüstan, Moldova Şərq tərəfdaşlığı proqramında təmsil olunur. Gürcüstan və Moldova Avropa İttifaqı ilə assosiasiya sazişi də imzalayıb.
