Rusiyaya bank sanksiyasının nə fəsadları olacaq?
Ukraynaya hərbi təcavüz edən Rusiyaya dünya birliyinin tətbiq etdiyi əsas sanksiyalardan biri ölkənin 10-dan çox iri bankının SWİFT sistemindən çıxarılmasıdır. Novator.az-ın məlumatına görə, iqtisadçı Natiq Cəfərli bununla bağlı arayışında qeyd edir ki, 200 ölkənin və 11 min bankın qoşulduğu SWİFT sistemi köçürmələrin tez və təhlükəsiz aparılması üçün çox önəmlidir: “Belçika şirkəti olan SWİFT-in əməliyyat mərkəzləri həmin ölkədə, İsveçrədə və ABŞ-da yerləşir. Hər bir bankın açar rolu oynayan unikal kodu var, ona görə də köçürmələr tez və təhlükəsiz həyata keçirilir.
SWİFT vasitəsilə hər gün 4 trilyon dollarlıq əməliyyat olur. Əməliyyat sayına görə Rusiya dünyada ikinci yeri, köçürülən vəsaitin həcminə görə isə on ikinci yeri tutur.
Öz “SWİFT”i olan Çin daxili əməliyyatların az qala hamısını alternativ sistemlə həyata keçirir. 2014-cü ildə Rusiya da daxili pulköçürmə sistemi – bank kartı olan “MİR” yaradıb. Daxildə işləyir, amma “MİR”lə ödənişlər qəbul edən bankların hamısı beynəlxalq sistemin bir parçasıdır. Yəni bankların SWİFT-dən qoparılması “MİR” vasitəsilə əməliyyatları da ləngidəcək. Bəzən əməliyyatlar günlər ala bilər ki, bu da bank kartı anlayışını mənasız edir, deməli, Rusiya nağd əməliyyatlara dönəcək.
Sadə Rusiya vətəndaşı bununla nə itirir? Hər il 20-25 milyon rusiyalı xaricə səfər edirdi, indi onların bank kartları xaricdə işləməyəcək, daxildəki əməliyyatlar isə çox ləng aparılacaq, internet-mağazalardan alış-veriş çətinləşəcək, nağd əməliyyatlar da müşkül olacaq.
Biznes nə itirir? İri biznesi kənara qoysaq, kiçik və orta sahibkarlar Rusiyada hər gün xarici tərəfdaşları ilə yüz minlərlə əməliyyat həyata keçirir, mal alarkən pulunu ödəyir, satarkən pulunu alır, indi bu əməliyyatlar çox çətinləşəcək”.
