UEFA-dan Rusiyaya sanksiya
Ukraynada işğalçı müharibə aparan Rusiya Avropanın ali futbol təşkilatının sanksiyasına məruz qalıb. Novator.az-ın məlumatına görə, fevralın 25-də UEFA İcraiyyə Komitəsi Çempionlar Liqasında 2021-2022 mövsümünün final matçının Sankt-Peterburq şəhərindən alınmasına qərar verib. Mayın 28-nə təyin olunan final matçının yeni ünvanı Fransanın paytaxtı Parisdir.
UEFA-nın əsas klub turniri olan Çempionlar Liqası 1/8 final mərhələsindədir. 2021-2022 mövsümünün 1/4 finalı 5-13 aprelə, yarımfinalı 26 aprel-4 maya təyin edilib.
UEFA İcraiyyə Komitəsinin başqa bir qərarına görə, Rusiya və Ukraynanın həm yığma, həm də klub komandaları evdəki beynəlxalq oyunlarını neytral meydanda keçirməli olacaq.
2014-cü ildə Ukraynada xalq inqilabı Qərbə bağlı qüvvələrin hakimiyyətə gəlməsi ilə nəticələnib. Bunun ardınca Rusiya Ukraynanın Krım bölgəsini zəbt edərək özünə birləşdirib, Donbas bölgəsinin bir hissəsini də işğal edərək ərazidə separatçı rejimlər qurub.
2022-ci il fevralın 21-də Rusiya həmin rejimləri – “Donetsk Xalq Respublikası” və “Luqansk Xalq Respublikası”nı müstəqil dövlətlər kimi tanıyıb, hər iki rejimlə dostluq və qarşılıqlı yardım haqqında müqavilələr imzalayıb. Fevralın 24-də isə Rusiya prezidenti Vladimir Putin Ukraynada hərbi əməliyyatlara əmr verib. Həmin gün səhərdən Ukrayna torpağında qanlı döyüşlər gedir.
