Ermənistanda seçki günü
Ermənistan parlamentində prezident seçkisi martın 1-də start götürür. Dövlət başçısı postuna bir namizəd var.
Əvvəlki prezident Armen Sərkisyan yanvarın 23-də istefa verib. Fevralın 1-dən prezident səlahiyyətlərini parlamentin sədri Alen Simonyan icra edir.
İlk turda prezident seçilmək üçün deputatların dörddə üçünün səsi tələb olunur. İkinci turda namizəd deputatların beşdə üçünün səsini toplamalıdır. Üçüncü turda qələbə üçün sadə səs çoxluğu kifayətdir.
Ermənistan parlamenti 107 deputatdan ibarətdir. Baş nazir Nikol Paşinyanın sədrlik etdiyi hakim Vətəndaş Sazişi Partiyası qanunverici orqanda 71 mandatla təmsil olunur. Bu qurum prezident kürsüsünə yüksək texnologiyalar sənayesi naziri Vaahn Xaçaturyanı namizəd göstərib.
Novator.az bildirir ki, Vaahn Xaçaturyan 1959-cu il aprelin 22-də doğulub. Yerevan Xalq Təsərrüfatı İnstitutunu iqtisadçı ixtisası ilə bitirib. 1982-ci ildən “Razdanmaş” İstehsalat Birliyində çalışıb, 1989-cu ildən “Mars” dövlət müəssisəsində baş direktorun müavini postunu tutub.
1992-1996-cı illərdə paytaxt Yerevanın meri, 1996-1998-ci illərdə Ermənistan prezidentinin müşaviri, 1995-1999-cu illərdə parlamentin deputatı olub.
2000-ci ildən vətəndaş cəmiyyəti qurumlarında rəhbər vəzifələrdə işləyib, 2019-2021-ci illərdə bank sistemində fəaliyyət göstərib.
2021-ci il avqustun 4-dən yüksək texnologiyalar sənayesi naziridir.
Ermənistan prezidentindən istefa bəyanatı
Müvəqqəti dövlət başçısı, seçki qaydası
