2021-2022 mövsümündə Avropanın klub turnirlərinə 55 UEFA üzvünün 237 komandası buraxılıb. Novator.az bildirir ki, mübarizəni 18 UEFA üzvünün 48 komandası davam etdirir: Çempionlar Liqası, Avropa Liqası və Konfrans Liqasının hər birində 16 komanda qalır. İndiyədək yalnız Fransa (6 komanda) və Niderland (5 komanda) itki verməyib.

Çempionlar Liqasında qalan komandaların 9-u titul sahibidir. 1955-ci ildə yaradılan, 1991-ci ilə qədər Çempionlar kuboku adı daşımış turniri “Real” 13, “Bavariya” və “Liverpul” 6, “Ayaks” 4, “İnter” (İtaliya) və “Mançester Yunayted” 3, “Benfika”, “Yuventus” və “Çelsi” 2 dəfə zirvədə tamamlayıb.

Avropa Liqasındakı komandaların 5-nin titulu var. 1971-ci ildən keçirilən, 2008-ci ilədək UEFA kuboku adlanmış turnirdə “Sevilya” 6, “Portu” 2, “Ayntraxt” (Frankfurt), “Bayer”, “Qalatasaray” 1 uğur qazanıb.

Təmsilçisiz qalan Azərbaycan UEFA-nın klub reytinqində 26-cı pillədə göstərilir. Rusiya 10-cu, Ukrayna 12-ci, Türkiyə 19-cu, Qazaxıstan 29-cu, Belarus 32-ci, Moldova 33-cü, Litva 34-cü, Latviya 38-ci, Ermənistan 41-ci, Estoniya 45-ci, Gürcüstan 47-ci pillədə qərar tutub.

UEFA-nın klub reytinqi turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.

Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.

Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.

Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.

Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.

2021-2022 mövsümünü Azərbaycan 4,375 əmsalla başa vurub. Ümumi əmsal 17,000-dir.