Ermənistan: Baş Qərargah rəisi postdan çıxarıldı
General-leytenant Artak Davtyan Ermənistan Silahlı Qüvvələri Baş Qərargahının rəisi postundan çıxarılıb. Novator.az-ın məlumatına görə, prezident səlahiyyətlərini icra edən Alen Simonyan fevralın 24-də belə fərman imzalayıb.
Artak Davtyan 1970-ci ildə doğulub. Moskva Ali Hərbi Məktəbini, Rusiya Müdafiə Nazirliyinin Hərbi Akademiyasını və Rusiya Silahlı Qüvvələri Baş Qərargahının Hərbi Akademiyasını bitirib.
1990-1994-cü illərdə Birinci Qarabağ müharibəsində iştirak edib, 1991-1992-ci illərdə xüsusi alayda xidmət keçib.
1992-2005-ci illərdə Ermənistan Ordusunun müxtəlif hərbi hissələrində rəhbər vəzifələr tutub.
2006-cı ildən Ermənistan Silahlı Qüvvələri Baş Qərargahının operativ idarəetmə xidmətinin rəis müavini, 2007-ci ildən rəisi vəzifələrində çalışıb.
2017-ci ildən korpus komandiri olub.
2018-ci il mayın 24-də Silahlı Qüvvələrin Baş Qərargah rəisi təyin olunub, 2020-ci il iyunun 8-də həmin postdan götürülüb, həmin ilin iyul-oktyabr aylarında Hərbi Sənaye Komitəsinə rəhbərlik edib, 2021-ci il martın 9-dan Baş Qərargahın xüsusi tapşırıqlar üzrə böyük zabiti postunda çalışıb.
22 mart 2021-ci ildən yenidən Ermənistan Silahlı Qüvvələri Baş Qərargahının rəisi idi.
