Bayden: “Dünya Rusiyadan bunun hesabını soracaq”
ABŞ prezidenti Cozef Bayden Rusiyanın Ukraynaya hücumu ilə bağlı yazılı bəyanatla çıxış edib.
Novator.az-ın məlumatına görə, Bayden bildirib: “Rusiya prezidenti Vladimir Putin bilərəkdən fəlakətə və insan təlafatına gətirib çıxaracaq bir müharibəyə başlayıb. Bu hücumun səbəb olacağı ölümlərə, dağıntılara görə bütün məsuliyyət yalnız Rusiyanın üzərinə düşür. ABŞ, onun müttəfiqləri və tərəfdaşları bu təcavüzə birgə və qətiyyətlə cavab verəcək. Dünya Rusiyadan bunun hesabını soracaq”.
2014-cü ildə Ukraynada hakimiyyətə Qərbə bağlı qüvvələr gələndən sonra Rusiya bu ölkənin Krım Muxtar Respublikasını və Sevastopol şəhərini zəbt edərək özünə birləşdirib. Həmin il Rusiya Donetsk və Luqansk vilayətlərinin bir hissəsini də işğal edərək ərazidə separatçı rejimlər qurub.
2022-ci il fevralın 21-də Rusiya həmin rejimləri – “Donetsk Xalq Respublikası” və “Luqansk Xalq Respublikası”nı müstəqil dövlətlər kimi tanıyıb, hər iki rejimlə dostluq və qarşılıqlı yardım haqqında müqavilələr imzalayıb.
Fevralın 24-də Rusiya prezidenti Vladimir Putin Ukraynanın Donbas bölgəsində xüsusi hərbi əməliyyatlara əmr verib. Dövlət başçısı xalqa müraciətində əməliyyatların məqsədinin Ukraynanın silahsızlaşdırılması olduğunu bəyan edib.
Səhər tezdən Donbas bölgəsində döyüşlər gedir. Ukraynanın başqa ərazilərinə də, o cümlədən paytaxt Kiyevə hərbi zərbələr endirildiyi bildirilir.
Ukrayna parlamenti – Ali Rada ölkədə hərbi vəziyyət tətbiq olunmasına qərar verib.
