İsa Qəmbər – 65
Siyasi xadim İsa Qəmbərin 65 yaşı tamam olur.
Novator.az bildirir ki, İsa Qəmbər 1957-ci il fevralın 24-ü Bakı şəhərində doğulub. 1979-cu ildə indiki Bakı Dövlət Universitetinin tarix fakültəsini bitirib, Elmlər Akademiyasının Naxçıvan Elm Mərkəzində və Şərqşünaslıq İnstitutunda elmi fəaliyyət göstərib.
Azərbaycan Xalq Cəbhəsinin qurucularından, milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1993-cü ilin yayında Əbülfəz Elçibəyin başçılıq etdiyi milli demokratik hakimiyyət hərbi-siyasi qiyamla devriləndən sonra bir müddət həbsdə yatıb.
İsa Qəmbər əsası 1911-ci ildə qoyulmuş, 1920-ci ildən mühacirətdə fəaliyyət göstərmiş Müsavat Partiyasının bərpasının rəhbərlərindəndir. 1992, 1995, 1997, 2001 və 2006-cı illərdə partiya başqanı seçilib.
2014-cü ildə başqan postundan gedən İsa Qəmbər partiya Məclisinin üzvüdür.
Siyasətçilərin, müxtəlif sahələr üzrə ekspertlərin, ictimai xadimlərin təmsil olunduğu Milli Strateji Düşüncə Mərkəzinin qurucusu və sədridir.
