Rusiyada götür-qoy
Rusiya prezidenti Vladimir Putin parlamentin aşağı palatası olan Dövlət Dumasının müraciətini alıb və hazırda sənəd nəzərdən keçirilir.
Novator.az bildirir ki, fevralın 15-də Dövlət Duması Ukraynanın Donetsk və Luqansk vilayətlərində qurulmuş separatçı rejimlərin – “Donetsk Xalq Respublikası” və “Luqansk Xalq Respublikası”nın “müstəqil dövlətlər” kimi tanınması üçün prezident Vladimir Putinə müraciət qəbul edib.
2014-cü ilin fevralında Ukraynada hakimiyyət xalq üsyanı ilə dəyişəndən, Rusiyanın adamlarını Qərbə yaxın qüvvələr əvəzləyəndən sonra rus ordusu Ukraynanın Krım yarımadasını zəbt edib. Rusiya Krımı ilhaq etməklə bərabər Donbas bölgəsində iki separatçı rejimin – “Donetsk Xalq Respublikası” və “Luqansk Xalq Respublikası”nın əli ilə Ukraynanın bu bölgəsinin də bir hissəsini işğal altına alıb.
2021-ci ilin yazında Rusiya Ukrayna sərhədinə xeyli qoşun yığıb, yeni müharibə təhlükəsi yaranıb. Az sonra Rusiya qoşunlarının bir hissəsini geri çəkib. Lakin ilin sonlarına yaxın Rusiya yenidən Ukrayna sərhədi boyunca qoşun, hərbi texnika cəmləyib. Bütün bunlar Rusiyanın Ukrayna torpağına növbəti hərbi hücuma hazırlaşdığı istiqamətində ehtimallar doğurub.
Rusiya keçmiş SSRİ məkanında iki qondarma rejimi rəsmən müstəqil dövlətlər sayır. Gürcüstanın Abxaziya və Cənubi Osetiya bölgələri 1990-cı illərin əvvəlindən özünü müstəqil dövlət elan etmiş rejimlərin əlindədir. 2008-ci ildə Rusiya Abxaziya və Cənubi Osetiyanı işğal edərək onları müstəqil dövlətlər kimi tanımaq qərarı verib. Hər iki bölgədə Rusiyanın hərbi bazaları var.
