Ali məktəb tələbələri üçün prezident təqaüdünün məbləği 210 manatdan 250 manata qaldırılıb. Prezident İlham Əliyev fərmanı fevralın 14-də imzalayaraq onun 2022-ci il yanvarın 1-dən tətbiq edilməsini tapşırıb.

Azərbaycanın ali məktəblərinə qəbul imtahanlarında ən yüksək nəticə göstərmiş 102 nəfər tələbə üçün prezident təqaüdü 2001-ci il sentyabrın 3-də təsis edilib. Təqaüd tədris ilinin birinci semestri üçün təyin olunur. Bu müddətdən sonra təqaüdün verilməsinin davam etdirilməsi haqqında qərarı tələbələrin təhsildəki göstəricilərinə uyğun olaraq Təhsil Nazirliyi qəbul edir.