Yeni seçki, əvvəlki qalib
Almaniya Federal Məclisi fevralın 13-də Frank-Valter Ştaynmayeri yenidən ölkə prezidenti seçib. Hazırda 1472 üzvü olan Federal Məclis parlamentin deputatları və bölgələrin nümayəndələrindən ibarətdir.
Novator.az bildirir ki, 1956-cı il təvəllüdlü Frank-Valter Ştaynmayer Sosial Demokrat Partiyasının üzvüdür. 2005-2009 və 2013-2017-ci illərdə xarici işlər naziri postunu tutub, 2007-2009-cu illərdə hökumət başçısının – kanslerin müavini vəzifəsində də çalışıb.
İlk dəfə 2017-ci il fevralın 12-də prezident seçilən Frank-Valter Ştaynmayer həmin il martın 19-da səlahiyyətlərinin icrasına başlayıb.
Parlament idarə üsullu Almaniyada hazırda Sosial Demokrat Partiyasından Olaf Şolts kanslerdir. Hökuməti Sosial Demokrat Partiyası, Yaşıllar Partiyası, Azad Demokrat Partiyası qurub.
Frank-Valter Ştaynmayerə hakim koalisiya ilə yanaşı müxalif Xristian Demokrat və Xristian Sosial ittifaqları alyansı da dəstək verib.
